Та нар нэг өдөр намайг дэмжээрэй, би дөрвөн жил та бүхнийг дэмжье
Нийтэлсэн: 2013 6-Р Сар 09 Ангилал: Мэдээ, Сонгууль 2013

Нэр дэвшигч Ц.Элбэгдорж эртний түүхт Хархоринд сонгуулийнхаа сурталчилгааны ажлаар зургаадугаар сарын 8-нд ирж, иргэд сонгогчидтой уулзлаа. Уулзалтад УИХ-ын дэд дарга Р.Гончигдорж, УИХ-ын гишүүн М.Батчимэг, Н.Батцэрэг, Өвөрхангай аймгийн Засаг дарга Д.Тогтохсүрэн нар оролцов.

Уулзалтыг нээж Хархорин сумын Засаг дарга Л.Энхбат хэлэхдээ “Бид шинэ Хархорин хөтөлбөрөө иргэдээрээ хэлэлцүүлэн орон нутгийн санд хуваарилсан мөнгөөрөө хэрэгжүүлж эхэлж байна. Ардчиллын төлөө түүчээлэн ажиллаж ирсэн Ерөнхийлөгчөө дахин сонгогдож, 2009 оноос эхлүүлсэн олон ажлаа үргэлжлүүлнэ гэдэгт итгэж байна” гэлээ.

УИХ-ын гишүүн Н.Батцэрэг хэлэхдээ “Нийгэм, эдийн засгийн тулгамдсан олон асуудлыг хамтран шийдвэрлэх үүднээс МҮАН нэр дэвшигч Ц.Элбэгдоржийг дэмжихээр шийдвэрлэсэн. Нөгөө талаар Монголд улс төрийн тогтвортой байдал чухал байна” гэв.

УИХ-ын гишүүн М.Батчимэг дэмжиж үг хэллээ. Тэрээр хэлэхдээ “Төрсөн нутагтаа та бүхэнтэй уулзаж байгаадаа баяртай байна. Би УИХ-ын гишүүн гэсэн утгаар бус эх хүн, бас судлаачийн хувьд нэр дэвшигч Ц.Элбэгдоржийг дараах гурван үндэслэлээр дэмжиж байгаагаа хэлэх гэсэн юм. Нэгд авлигатай тууштай тэмцэж байгаа хүн. Хоёрт 20 гаруй жил ардчиллыг бэхжүүлэхээр эргэлт буцалтгүй ажиллахдаа хүний төлөө зүтгэх итгэл, үнэмшилтэйгээ харуулсан хүн. Түүний иргэддээ эрх чөлөө, эрх мэдэл өгөх гэсэн хүчин чармайлт нь өнөөдөр бодит ажил болсныг та бүхэн мэдэж байгаа. Гуравт дэлхийд улс орноо хүлээн зөвшөөрүүлж чадсан хүн. Тиймээс энэ хүн Ерөнхийлөгчийн ажлыг бусад нэр дэвшигчдээсээ хавьгүй илүү гүйцэтгэж чадна гэж бодож байна” гэлээ.

Дараа ардчилсан хувьсгалын эхнээс 24 жил хамтран нэгэн зорилгын төлөө яваа журмын нөхөр нь болох УИХ-ын дэд дарга Р.Гончигдорж дэмжиж үг хэлэв.

-Танай суманд байрлуулсан самбар дээрх хөтөлгөө морьтой давхиж яваа зураг шигээ нэр дэвшигч маань бууж тухлан суугаад бодох ч завгүй эрч хүч, хурдтай ажиллаж байгаа хүн. Ц.ЭлбэгдоржМонгол орныхоо олон ястнаас бүрдсэн ард түмнийг цэвэр, бохир гэж ялгаж алагчилдаггүй. Ийм хүн л ард түмнийхээ эв нэгдлийг тогтвортой хангаж чадна. Монгол Улсын ардчилсан Ерөнхийлөгч, дахин нэр дэвшигч Элбэгдорж бол ид шидтэн биш, харин ард түмнийхээ төлөө ажиллах сэтгэл, итгэл, зүтгэлтэй хүн. Энэ бол бидний түших, итгэх, дуурайх ёстой сайхан шинж чанар юм. Та бүхэн энэ хүний төлөө сүүн цацлаа өргөж, сэтгэлийн дэм үзүүлэн итгэлийн саналаа өгөөрэй хэмээн Р.Гончигдорж уриаллаа.

Нэр дэвшигч Ц.Элбэгдорж хэлэхдээ “Би Хархоринд ирэх дуртай. Бас хонох дуртай. Бидний зүтгэж буй ардчилал олон сайн талтай ч шийдвэр гаргах нь удаан байдаг. Гэхдээардчилсан Монгол Улсын нэр хүнд өнөөдөр дэлхийд маш сайн байна. Бид 1.5 тэрбум долларын бонд борлуулахаа зарлахад дорхноо 15 тэрбумын санал ирж байсан. Дэлхийн улс орнууд энэ мөнгийг Монголын дарга нар нь хуваагаад идчихгүй юм байна гэж бидэнд итгэж байна. Бондынхоо мөнгөөр бид төмөр замаа тавина. Цахилгаан станцуудаа барина. Орон сууцны зээл өгнө. УИХ, Засгийн газар, Ерөнхийлөгч гурав нэг зүг рүү харж ажиллаж байна.

Хархориныг би хотын статустай хөгжүүлэхийг хүсдэг. Анх удаа орон нутгийг хөгжүүлэх санд 270 гаруй тэрбум төгрөг хуваариллаа.

Одоо намждаг, улс төрждөг цаг өнгөрсөн. Амьдралаа, ажлаа, хот сууринаа бодож сонголт хийдэг цаг. Та бүхэн хэн нь илүү хийж чадах вэ гэдгийг л бодож Ерөнхийлөгчөө сонгоорой. Миний хувьд хоёр дахиа сонгогдчихвол дахин улс төр, сонгууль гэж байхгүй. Зөвхөн ард түмнийхээ л төлөө зүтгэх болно.

Монгол Улс нэг хүнд ногдох нүүрсээрээ дэлхийд тэргүүлдэг. Нүүрснээсээ бензин гаргаж ард түмнийхээ хэрэгцээг хангавал шатахууны үнэ хямдарна. Эдийн засаг босч ирнэ. Төмөр замаа тавьчихвал 18 сая биш 100, 200 сая тонн ачаа тээвэрлэнэ. Түүнийг дагаад олон хүн ажилтай болно. 5,6,7,8 дугаар цахилгаан станцыг баримаар байна. Энэ бүхний төлөө бид ажиллана. Мөн Хархорины төлөөх ажил бүхний ард Монгол Улсын Ерөнхийлөгч байх болно. Гурван тэрбум төгрөг төсөвт суулгаж байж Хархорин инженерийн шугам сүлжээгээ байгууллаа. Одоо дээр нь орон сууцаа, буудлаа, аялал жуулчлалын төвүүдээ барих хэрэгтэй. Хархорин босвол Монгол босно гэж хэдэн жилийн өмнө би хэлж байсан. Танай сумын нутгийн 19 хувь нь гурван жилийн өмнө лицензийн газарт хамаарч байсан бол одоо 5 хувь болж буурлаа. Та бүхнийг ойрын жилүүдэд газартай болгоно. Газар бол мууддаггүй, эвдэрч хуучирдаггүй хамгийн үнэтэй хөрөнгө. Би ард түмнийхээ төлөө сайн бүхний ард байх болно. Ахмадууд, залуучууд, ээжүүд, хөгжлийн бэрхшээлтэй иргэдийнхээ төлөө байх болно. Та бүхэн сайн явахдаа Ерөнхийлөгчийг мартаж болно. Харин ядарсан үедээ Ерөнхийлөгчдөө хандаж байгаарай.

6 дугаар сарын 26-нд нэг өдөр намайг дэмжээрэй. Би та бүхнийг дараагийн дөрвөн жил дэмжье” гэлээ. Мөн өнгөрсөн 4 жид хийсэн ажлынхаа талаар, ирэх 4 жилд хийхээр мөрийн хөтөлбөртөө тусгасан олон зүйлийн тухай ярьж танилцуулав.

Хархоринчууд ардчилсан Ерөнхийлөгчөө дэмжихээ илэрхийлсэн юм.

“Авлигачдыг байж суух газаргүй болтол тэмцэнэ”

Монгол Улсын Ерөнхийлөгчийн сонгуульд Ардчилсан намаас нэр дэвшигч Ерөнхийлөгч Ц.Элбэгдорж өчигдөр орой Өвөрхангай аймгийн Арвайхээр суманд ажиллалаа. Монгол Улсын Ерөнхийлөгчийг Өвөрхангай аймагт хүрэлцэн ирэхэд Арвайхээр сумын цэргийн хүрээнийхэн хүндэтгэн жагсч, орон нутгийн удирдлагууд угтан авлаа. Түүний дараа нэр дэвшигч Богдхаант Монгол Улсын Ерөнхий сайд, Сайн ноён хан Намнансүрэн, Ерөнхий сайд асан П.Гэндэн нарын хөшөөнд цэцэг өргөж хүндэтгэл үзүүллээ.

Монгол Улсын Ерөнхийлөгчийг дагалдан УИХ-ын дэд дарга Р.Гончигдорж, УИХ дахь “Шударга ёс” эвслийн бүлгийн дарга Н.Батцэрэг, УИХ-ын гишүүн М.Батчимэг, Мэргэжлийн сумогийн 68 дахь их аварга асашёорюү Д.Дагвадорж, Даян аварга А.Сүхбат, Монгол Улсын гавьяат тамирчин Ч.Дамдиншарав нар дээрх аймагт ажилласан юм.

Өвөрхангай аймгийн иргэд сонгогчидтой хийсэн уулзалтыг нээж УИХ дахь “Шударга ёс” эвслийн бүлгийн дарга Н.Батцэрэг Монгол Улсын Ерөнхийлөгч Ц.Элбэгдоржийг дахин сонгох хэд, хэдэн бодитой шалтгаан бий болсныг онцлон тэмдэглэсэн юм.


Нэгдүгээрт, Монголын ард түмний өмнө ардчиллын том давалгаа бий болсон. Энэ бол бүтээн байгуулалтын давалгаа. Үүнийг айл гэрийн хүн бүрт хүргэх ёстой.

Хоёрдугаарт, дэлхий дахин Монгол орныг ардчилсан улс гэдгийг орчуулгагүйгээр мэддэг болсон. Дэлхий дахинд Монгол ардчилсан орон гэдгийг таниулсан хүн бол өнөөгийн Ерөнхийлөгч Ц.Элбэгдорж.

Гуравт, авлигагүй, архигүй, алагчлалгүй нийгмийг байгуулах нийгмийн захиалга ирээд байгаа. Тийм учраас эхлүүлсэн ажлыг нь Ерөнхийлөгч Ц.Элбэгдоржоор гүйцээн хийлгэх сонголт Монгол ард түмэн та бидний гарт ирсэн шүү гэдгийг онцлон захисан юм.



УИХ-ын гишүүн М.Батчимэг “Ерөнхийлөгч хүн бол хүний төлөө сэтгэлтэй хүн байх ёстой. Ерөнхийлөгч Ц.Элбэгдорж, тэргүүн хатагтай Н.Болормаа нар тийм л хүмүүс. Дөрвөн хүүтэй байхдаа нэг охин өргөж авсан, дараа нь эцэг, эхээсээ өнчирсөн, хүнд хэцүү амьдрал туулсан 20-иод хүүхдийг үрчилж авч өсгөсөн. Хүнээр хүн хийнэ гэдэг бол хамгийн хэцүү ажил. Гэвч тэд халгасангүй тэр бүх хүүхдэд ээжийнх нь оронд ээж, эцгийнх нь оронд эцэг болж яваа хүмүүс” гэдгийг тодотгосон бол асашёорюү Д.Дагвадорж “Монгол хүний үнэлэмж бол хүний эрх, эрх чөлөө байх ёстой. Энэ эрх чөлөөг бий болгож чадсан хүн бол өнөөгийн тэргүүн. Тэр спортод ч элэгтэй. Өвөрхангайчууд та бүхэн маань өнөөгийн Ерөнхийлөгчөө дэмжээрэй, монголчууд бид энэ хүнийг дэмжиж дахин төрийн тэргүүнээр сонгосон цагт улс орон хөгжих юм шүү” гэсэн бол Даян аварга А.Сүхбат “Залуусаа дэмждэг, спортод элэгтэй Ерөнхийлөгчөө Монголын залуучууд, өвөрхангайчууд мөн дэмжинэ гэдэгт итгэл дүүрэн байна хэмээлээ.



УИХ-ын дэд дарга Р.Гончигдорж “Ерөнхийлөгч байна гэдэг юм бодоод суралцдаг ажил биш. Мориноосоо буух завгүй ажиллах ёстой алба. Цай сүүнийхээ дээжийг өргөн өвөрхангайчууд маань Ерөнхийлөгч Ц.Элбэгдоржийг дэмжиж сонголт хийгээрэй” гэдгийг онцлон хүслээ.

Харин нэр дэвшигч Монгол Улсын Ерөнхийлөгч Ц.Элбэгдорж “Өвөрхангайд ирэхэд бороо шивэрч хураар угтан их сайхан угтан авлаа. Сэтгэл минь их хөдөлж байна. 2009 онд Монгол Улсын Ерөнхийлөгчийн сонгуульд нэр дэвшиж байхад Өвөрхангай аймгийн нутаг дэвсгэрийн 19 хувь нь ашигт малтмалын лицензит талбайд хамаарч байсан бол одоо таван хувь болж буурсан. Хууль бусаар олгогдсон ашигт малтмалын лицензийг цуцлах, хориглох, шинээр олгохыг хориглосон энэхүү шийдвэрийн дүнд Өвөрхангай аймгийн лицензт талбайн хэмжээ өнөөдөр таван хувь болж дөрөв дахин буурсан байна. Энэ бол мал бэлчээртэй, малчид өвөлжөө, хаваржааны нутагтай байна гэсэн үг. Улс орон хөгжинө. 2015 он гэхэд 21 аймаг Улаанбаатар хоттой авто замаар холбогдсон байна. Зам дагаж хөгжил гэдэг. Үүнийг Ардчилсан нам хийнэ. Мөн хүүхдээ харж байгаа эхчүүд рүү хандсан төрийн үйлчилгээг бид илүү сайжруулна. Хүүхэд харах үйлчилгээг нэвтрүүлнэ. Авлигатай тууштай тэмцэнэ. Зөвхөн газрын наймаанаас авлигачид 294 тэрбум төгрөг идсэн байна. Энэ бол 100 сургууль, эмнэлэг барих хэмжээний мөнгө авлигачдын ханцуйд орсон гэсэн үг. Цаашдаа би авлигчдыг байж суух газаргүй болтол нь тэмцлээ үргэлжлүүлнэ. Ачаагаа анх авч гарсан хүн л бүтнээр нь зорьсон газартаа хүргэж чаддаг юм. Надад ганц нам бий, тэр нь Монголын ард түмэн та нар юм” гэснийг өвөрхангайчууд уухайлан дэмжиж, авлигачидтай хийх тэмцлийнхээ эрчийг бууруулж болохгүйг сануулснаар энэ удаагийн уулзалт өндөрлөлөө.

Арвайхээр хотоос Улаанбаатар хот руу хөдлөх замдаа Монгол Улсын Ерөнхийлөгч Ц.Элбэгдорж дагалдан яваа хүмүүсийнхээ хамтаар Зэвсэгт хүчний 256 дугаар ангид зочилж оройн тоонд оролцлоо. Монгол Улсын Зэвсэгт хүчний ерөнхий командлагч тэрээр цэргийн тангараг өргөсөн дайчин бүрийнхээ төлөө, ахлагч, офицер бүрийн нийгмийн асуудлыг шийдвэрлэх хүрээнд тууштай бодлого дэвшүүлэн ажиллахаа илэрхийллээ. Тухайлбал, Цэргийн алба хаасан залууг хамгийн түрүүнд төрийн албанд ажилд авдаг болохоос эхлээд бүхий л талаар дэмжих бодлого үргэлжилнэ гэдгээ мэдэгдсэн юм.

Ийнхүү Монгол Улсын Ерөнхийлөгч Ц.Элбэгдорж Зэвсэгт хүчний 256 дугаар ангид зочилсноор орон нутагт ажилласан томилолтоо өндөрлүүллээ.