ХОЁР САЯ ЗУРГААН ЗУУН МЯНГАН ЧИНГИС СЭРЖ БАЙНА
Нийтэлсэн: 2008 1-Р Сар 01 Ангилал: Мэдээ, Мэндчилгээ

 

                                                               Ардчилсан Намын дарга Цахиагийн

                                                           ЭЛБЭГДОРЖ-ийн 2008 оны анхны өглөө

                                                      ард түмэндээ дэвшүүлсэн мэндчилгээ

 

(Зөв бодлого- Зөв сонголт)

Эрхэм хүндэт Монгол ах дүү нар аа.

            Шинэ оны, шинэ өдрийн мэндийг Та бүхэндээ хүргэе. Шинэ он эхэлж байна, шинэ эрч хүч ирж байна. Шинэ цаг ирж яваа. Дорнын талаас мандсан нар Алтайн их уулс, Хангайн хөвч нурууд, Говь хээрийн хээлд уусч, давхил дундаа яваа морьтны дүрст Монгол нутгийг элчил үгүй гэрлээрээ ялгал үгүй гийгүүлж байна. Өнгөрөгч мянганыг их түүх, эрх чөлөө хоёроороо эзэгнэсэн тэнгэрийн хөх тамгатай монголчууд гурав дахь мянганыхаа нэгэн их оны шинэ өдрийг ийнхүү угтаж байна.

            Миний ард түмэн дэлхийн тал улаан байхад, Монголын талд эрх чөлөөний туг барьж боссон эрх чөлөөний баатрууд билээ. Япон тэнгисээс Европын зүүн эрэг хүртэлх уудам орон зайд өнчин ганц ардчиллыг амьдруулж яваа гавьяатнууд билээ. Монголын эрх чөлөө, монголын ардчилал энэ өдөр 18 хүрч байна. Тэр жил хөр цасан дунд дөрвөн хөллөж буусан цагаан унага Монголын газрын зургийн энгээр өсөж монгол түмний хувь заяаг дүүрэн билэгтэй, түвшин жаргалтай авч явах ир нь жагссан хурдан хүлэг болжээ.

            Өнөө өглөө АРДЧИЛСАН НАМ 18 НАСНЫ БОСГО АЛХЛАА. Ардчилсан Намыг хүмүүс залуучуудын нам гэдэг байсан. Одоо энэ намд залуус нь ч, ахмадууд нь ч, идэр насныхан ч эгнэн жагсчээ. Заримынх нь хувьд Ардчилсан Нам эмээ өвөөгийнх нь нам болжээ. Ерэн онд залуу байсан Бат-Үүл, Сосорбарам нар өнөр олон ач зээтэй цоо шинэ өвөө боллоо. Ардчилсан Нам өсч өргөжин улам олуулаа боллоо.

            Өнөөдөр монголчууд ардчиллаа эрийн цээнд хүрснийг тунхаглан зарлаж байна. Хүүгээ 18 нас хүрэхээр бид цэрэгт явуулдаг. Охид маань 18 хүрэхээрээ айлын голомтод гал асааж өрх өсгөдөг. Ингэж ээжийн охид, аавын хөвгүүд эх орноо үүрдэг. Өнөөдөр Ардчилсан Намд энэ ачаа ирж байгааг бид мэдэрч байна. Эх орныхоо хөгжил дэвшлийн төлөө зүтгэнэ гэдэг бол эрхэм үүрэг. Энэ ариун үүргийг Ардчилсан Нам өргөж явна, хайрлаж явна гэдгээ бид бас зарлаж байна.

            Гарч байгаа 2008 он бол Ардчилсан Намын хувьд ч, ард түмний маань хувьд ч хариуцлагатай, түүхэн он. Монголчууд бид 18 жилийн танин мэдэхүйн амаргүй зам тууллаа. Яавал бидний зам зөвдөхийг, яавал бидний зам буруудахыг мэддэг мэдэрдэг боллоо. Бид оносноосоо алдсан нь илүү байж магадгүй. Харин бидний алдаа бүхэн сургамж болж, судар болж бидний мах цусанд, оюун санаанд сууж үлдлээ. Хүмүүс хэрсүүжиж, хашир боллоо. Сэтгэлийн, итгэл үнэмшлийн хаттай боллоо. Гэхдээ та бид тайвшрах болоогүй.

            2008 ОН БОЛ АЛДАЖ БОЛОХГҮЙ ОН. Учир нь тэр алдааг засах цаг, боломж та бидэнд байхгүй. Ардчилсан Нам ачааны хүндийг үүрнэ, бидэнд хариуцлага ирнэ гэдгийг мэдэрч байна. Өнгөрөгч 18 жилийн алдаа оноо бүхний дундуур Ардчилсан Нам ард түмэнтэйгээ хамт явсан. Ардчилсан Нам бол монгол түмэнтэйгээ адил хүсэл тэмүүлэлтэй, зовлон жаргалтай нам. Монголчуудын шинэ сонголтын төлөө хариуцлага хүлээсэн хариуцлагатай улс төрийн хүчин.

Ардчилал бол монголчуудын нийтлэг ололт. Ардчиллын ачаар хүн бүр өөрийн хүсэл зоригоор, өөрийн сонголтоор ажиллаж амьдрах боломжоо гартаа авлаа. Сүсэг бишрэлдээ, итгэл үнэмшилдээ эзэн боллоо. Өмч хөрөнгөө эзэмшиж, өсгөж үржүүлдэг боллоо. Зангаа дохио, заавар тушаалаас айлгүй их түүхээ шүтдэг боллоо, эрх чөлөөгөө эдэлдэг боллоо. Зам явах авалгүй зорчдог боллоо бид. Засгийн газартай, газаргүй амьдардаг боллоо бид. Эрх чөлөөндөө, Эх сайхан Монголдоо жинхэнэ ёсоор эзэн болохын тулд их зүйлийг бас хийх хэрэгтэй байна. Бид Монгол Улсынхаа хөгжил дэвшлийн төлөө хийх ёстой бүхнийг хий гэсэн ч хийнэ, битгий хий гэсэн ч хийнэ.

            Ардчилсан Нам сүүлийн жилүүдэд Засагт ч ажиллалаа, Зөвлөлд ч ажиллалаа. Хот сууринд ч ажиллаж байна, хөдөө ч ажиллаж байна. Монгол Улсад шинээр бий болж байгаа олон шинэчлэл, өөрчлөлтийн түүчээ нь болж өмнө нь ч зүтгэж байсан, одоо ч зүтгэж байна. Монгол хүнд хүртээмжтэй, наалдацтай бодлого бүрийн төлөө идэвхтэй санаачилгатай ажиллаж байна. Өнөөдөр УИХ-ын 3 гишүүн тутмын 1 нь Ардчилсан Намынх. Орон нутгийн иргэдийн төлөөлөгчдийн дунджаар 4 төлөөлөгчийн 1 нь Ардчилсан Намынх. Гэхдээ бид цөөхүүлээ ч чадлаараа ажилласан. Бид 2004 оны сонгуулиар ард түмэндээ өгсөн амлалтынхаа 9 зүйл тутмын 8-г амьдралд хэрэгжүүлж чадлаа.

            Ардчилсан Нам яг жилийн өмнө “2007 оны нэгдүгээр сарын 1-нээс эхлэн хүүхдийн мөнгө бүрэн хэмжээгээр олгогдох болсныг мэдэгдэж” амласнаа биелүүлсэн “Батламж”-ийг айл бүрт шинэ оны мэндчилгээтэй хүргүүлсэн. АРДЧИЛСАН НАМ ХЭЛСЭН Л БОЛ ХИЙДЭГ, амласан л бол биелүүлдэг. Ажил хөдөлмөр хийж, бизнес эрхэлж байгаа иргэдийнхээ халуун талархлыг татварын шинэтгэлийг санаачилж хэрэгжүүлэхэд идэвхтэй оролцсоныхоо төлөө сонсоход бидэнд сайхан байна.

Өнгөрөгч 3 жил 6 сард хийсэн ажлаа олон нийтийн хэвлэл, мэдээллийн хэрэгслээр дамжуулан ард түмэндээ таниулж байна. Ардчилсан Нам газар бүр хийсэн бүтээснээ тайлагнаж, ард түмнээ сонсож байна. Эхлээд намаа шинэчилье, дараа нь улсаа шинэчилье гэж шинэчлэлийн үйлсэд ханцуй шамлан зүтгэлээ. Бид намаа шинэчлэхийн төлөө их зүйл хийсэн, цаашид ч хийнэ. Бидний хийх ажил үүгээр өндөрлөж байгаа биш, бидний хийх ажил эхэлж байна.

Шинэ оны шинэ өдөр ч эхэллээ. Урьд шөнө адуу манасан эр уяан дээрээ уур савсуулан бууж байгаа. Шөнөжин хот руу, бас олны ажлыг амжуулан хотод давхисан олон жолооч, олон хүн гэртээ орж байгаа. Манаанд гарсан цэрэг халаагаа өгч, шинэ харуул халаагаа авч байгаа. 2008 оноор овоглох шинэ Монгол охин, шинэ Монгол хүү ээжийнхээ үнэрт одоо сэрж байгаа. Айл гэр, хамт олон, хүн бүрийн амьдралд шинэ оны шинэ түүх ингэж эхэлж байгаа.

Мандан гарч байгаа нарыг буцаан жаргааж болох биш. Угтан ирж байгаа их үйл хэргийг буцаан эргүүлж болох биш. Өнгөрсөн он жил бүхэнд үлдэж хоцорсон муу сэтгэгдэл, муу дурсамжаа тэнд нь орхиё. Хичнээн шүүмжлээд, хичнээн яриад бид өнгөрснийг засаж чадах биш. Урагшаа явцгаая.

Ардчилсан Намд ард түмнээсээ авсан санал байна.  Орон даяар элч довтолгож, манай намын гишүүд дэмжигчид тэр элч нь болж айл бүхнээс шахам цуглуулсан, давхардсан тоогоор 2 сая гаруй санал бидэнд байна. Энэ бол улс гэрээ яаж хөгжүүлэх вэ, ямар асуудлууд тулгамдаж байна, тэр асуудлыг яаж шийдэх вэ  гэсэн ард иргэдийн маань санал. Бид ард иргэдээсээ намдаа хандсан саналтай цуг их урам зориг авч байна, бас их эрч хүч, их итгэл найдвар хүлээн авч байна.

Хүмүүсийн хүлээлт өндөр байна. Шуудхан хэлье. Сайхан амьдрал хэцүү замаар олдоно. Амрыг дагаж унах уу, хэцүүг сөрж босох уу гэдэг сонголт Монголчуудын өмнө байна. Бид сайн сайханд хүрэхийн тулд их хөдөлмөрлөх хэрэгтэй болох нь. Зарим хүмүүс хямд үнэ нэхэж байна. Зарим нь мөнгө нэхэж байна. Зарим нь үнэгүй үйлчилгээ нэхэж байна. Үнэгүй юм амьгүй. Үнэгүй юм гэж байхгүй.

 

Үнэнийг хэлье. Үнэ цаашид буурахгүй. Гурилын үнэ буулгана л гэнэ. Ингэж нүглийн нүдийг гурилаар хуураад яах вэ.  Юм үнэд орно. Бид үнэтэй талх иднэ. Бид үнэтэй гурил иднэ. Үнэтэй ус ууна, үнэтэй түлш хэрэглэнэ. ТАЛХНЫ ҮНЭ НЭМЭГДВЭЛ АЛХНЫ ҮНЭ НЭМЭГДЭНЭ. Хөдөлмөр үнэтэй болно, өрсөлдөөнтэй болно. Хөрөнгө оруулалт өснө, хүмүүс ажилтай орлоготой болно. Хүн үнэтэй болно. Хөгжил дэвшил ирнэ. Хүнс хоол хүртэл чанартай, хүртээмжтэй болно.

Бид харин хүнд суртлын үнийг буулгана. Бид үүнийг хийж чадна. БИД ИРГЭНЭЭСЭЭ БАЯН ЗАСАГ БАЙХЫГ ЗӨВШӨӨРӨХГҮЙ. Засгаасаа баян иргэн байхыг дэмжинэ. Ардчилсан хувьсгалаар Кремльд байсан эрх Засгийн Ордонд ирсэн. Одоо Засгийн ордонд байгаа эрхийг иргэн таны гэрт оруулж өгнө. Дарга шийддэг иргэн дагадаг биш иргэд шийддэг засаг гүйцэтгэдэг тогтолцоог бий болгоно. Ингэж засгийн эзэнт биш ИРГЭНИЙ ЭЗЭНТ НИЙГМЭЭ БАЙГУУЛНА. Иргэд оролцдоггүй нийгэмд иргэний нийгэм төлөвшихгүй байна. Хүний оролцоогүй нийгэм өөрөө хүн чанараа гээж байна.

  Ардчилсан Нам сонгуульд Засгийн эрхийг өөртөө авах гэж биш тэр эрхийг ард түмэнд атгуулах гэж орно. Мянган км-ын цаана байгаа сум сургуулийн дотуур байрны, салхивчны шил гуйж Сангийн яамыг царайчилдгийг зогсооно. Ингэхийн тулд бид хуулийг ч өөрчилнө, нэмэр болохоос нэрмээс болсон бүтцүүдийг ч татан буулгана. Хуулиар булаасан эрхийг, хуулиар буцааж өгнө. Төвд эрх мэдэл, хөрөнгө баялаг төвлөрүүлэх гэж биш түүнийг иргэдэд, орон нутагт эдлүүлэх гэж бид сонгуульд орно.

Баялаг хүнд очиж байж л баялаг болдог. Засгийн бүтээсэн баялаг, Засгийн бий болгосон эрх чөлөө гэж үгүй. Ард түмэнгүй ардчилал гэж байхгүй. Ард түмэн оролцдоггүй, ард түмэн ашиг тусыг нь хүртдэггүй ардчилал бол ардчилал биш. Ардчилсан Нам иргэддээ улс төрийн эрхийг нь ч өгнө, эдийн засгийн эрхийг нь ч өгнө. Хүний эрхийг нь ч өгнө. Ингэж бид өнөөгийн  хүнд сурталтнуудын хамжлагат ёсноос иргэдээ чөлөөлж, албан тушаалтнуудын барьцаанаас суллана. Үүнийг бид сайн хийж чадна. Тун сайн хийж чадна шүү.

Ажилтай, амьдралтай байх эрмэлзэл нь хар аяндаа бүтдэг, ажил хөдөлмөр хийхэд амьжиргаа нь хар аяндаа дээшилдэг тийм л  нийгмийг хүмүүс хүсэж байна. Хувьсгалын эхний шатанд монголчууд ардчилал, эрх чөлөөг мэдэрч эрийн цээд хүрсэн бол, хувьсгалын дараагийн шат нь иргэний эрхийн чөлөөлөлт байх болно.

Монгол хүн Монгол нутагтаа ажил амьдралтай сэтгэл хангалуун аж төрдөг тийм орчин бүрдүүлэхийн төлөө Ардчилсан Нам бүхнийг хийх болно. Шилдэг иргэдээсээ экспортлохоо зогсооё. Харин  сайн хүнээ биш сайн бараа гадагшаа гаргадаг орон болъё. Ингэхийн тулд монголын ХУВЬСГАЛЫН ХОЁРДОХ ШАТ-ҮЙЛДВЭРЖИЛТ байх болно. Хүмүүс ажилтай болно. Өөрийнхөө баялгийг бүтээнэ.

Ардчилал, чөлөөт эдийн засгийн буянаар ийм сайн цаг ирж байна. Өвөг дээдсийнхээ ачаар бид их баялагтай, их буянтай эх орон өвлөжээ. Монголын баялаг Монголын буян үнэд орж байна. Энэ үнэ хөрөнгө татна. Энэ үнэ дэд бүтцийг, үйлдвэрийг босгоход нэмэр болно.

Монголчууд буяндаа эзэн болж нэг бодлоготой нэг зүгт ажиллаж чадвал дэвшил ойрхон байна. Монголчууд шороо биш, бараа гаргадаг орон болоход ойрхон байна. Ингэхийн тулд үндэсний хөрөнгөтнүүдээ, үндэсний үйлдвэрлэлээ дэмжье. Үйлдвэр хөгжвөл хөдөлмөр хөгжинө. Хөдөлмөрийн соёл төлөвшинө. Ажил хийвэл бүгдээрээ ам тосдоно. Хөдөлмөрлөж байгаа хүн өөрөө хөгжинө. Хүн хөгжвөл улс хөгжинө.

Одоо бүгдээрээ халамжийн улс болох зам руу явж байгаа, тэр замаас татгалзъя. Халамж хүний чанарыг доройтуулж байна. Хүний чанар доройтвол улс үндэстний чанар доройтох нь. Бид ийм замаар удаан явж болохгүй. Бүгдээрээ халамжийг шүтэж биш хүний хөгжлийг, ХӨДӨЛМӨРИЙГ ДЭМЖИЖ АМЬДАРЪЯ. Хүнээ өмч хөрөнгөтэй, ажил хөдөлмөртэй, хөгжилтэй эрүүл болгоход бүхнээ зориулъя.

 

Үүнийг хийхийн тулд нэг л зүйл хэрэгтэй. Монгол хүн өөрөө хөдөлмөрлөх хэрэгтэй. Хүн хөдөлмөрлөх эрмэлзэлтэй, тэр эрмэлзэл нь өөрөө биелдэг, хөдөлмөр нь хүнд орлого баялаг, аз жаргал авч ирдэг байх ёстой. Бид ийм зөв орчин бүрдүүлэхийн төлөө хичээн ажиллана. Бүгд аль аль талдаа хичээцгээе. Эхлээд нам нь, засаг нь хүмүүсийг өөрийн болгодгоо зогсоох ёстой. Хүмүүс ч намын, засгийн, улсын, хүний хүн байхаа болих хэрэгтэй. Бид чинь аавын хүү, ээжийн охин шүү дээ.  Ингэж л хүн өөрөө өөртөө эзэн болох ёстой. Хувь заяандаа хүн өөрөө эзэн болох ёстой.

 Хүн өөрөө нам, засгийн хүн биш, нам, засаг нь хүний юм болж хувирах ёстой. Та өнөөдрөөс эхлээд намыг ч, засгийг ч өөрийн юм гээд бодчих. Хэрэгтэй үедээ сана, тэднийг ашигла. Хэрэгтэй үедээ намыг ч, засгийг ч дуудаж ирээд үйлчлүүл, зарцал. Хэрэггүй үедээ тэднийг март.

Монголын бахархал бол Монголын засаг эсвэл нам биш. МОНГОЛЫН БАХАРХАЛ БОЛ яах аргагүй МОНГОЛ ХҮН ТА. Хөдөлмөрч Монгол хүнийг, хичээл зүтгэлтэй Монгол хүнийг, эрх чөлөөт Монгол хүнийг бүгдээрээ тойрч бүжиглэе. МОНГОЛ ХҮН МОНГОЛ ХҮНЭЭ ДЭМЖЬЕ. АЖИЛ ХИЙЖ БАЙГАА ХҮНЭЭ ДЭМЖЬЕ. Байгаа баялгаа үүнд л зарцуулъя. Бид чинь малд явсан нэгэндээ илүү хоол тавьдаг монгол ёс уламжлалтай бишсэн билүү!

            Хуучин оны сүүлчийн өдрүүд шуургатай, цастай, хүйтэн байлаа. Одоо ч зарим газар салхи шилбүүрдэж, замгүй болтол, заримыг минь олдохгүй болтол  цас шуурч байна. Эцэг тэнгэр, эх байгаль аашаа үзүүлж байна. Бид чинь  газраа эх, тэнгэрээ эцэг гэж залбирдаг ард түмний үр сад.

 Газар ээжийн, тэнгэр аавын хүүхдүүд - монголчууд золбоо, хийморьтой амьдрах ёстой. Эзэн богд Чингис тийм л Монгол хүн байсан. Чингэсийг хэн байсныг дэлхий мэднэ. ТЭНГЭРИЙН ЗАЯАТ ХОЁР САЯ ЗУРГААН ЗУУН МЯНГАН ЧИНГИС ЭНЭ МОНГОЛ ГАЗАР ШОРООН ДЭЭР АМЬДАРЧ БАЙНА. Чингисүүд минь ямар амьдарч байгаагаа эргэн тойрондоо харцгаа.

Бидний амьдралыг хэн нэгэн гаднаас ирж уруу татаагүй. Бид л бие биенийхээ хөлөөс чангааж байна. Одоо үүнийгээ зогсооцгооё. Болъё. Чингис эзэн байсан, боол байгаагүй. БҮГДЭЭРЭЭ АМЬДРАЛДАА ЭЗЭН БОЛЦГООЁ. Эрчүүд нь гэрээ зөв авч явъя. Эмэгтэйчүүд нь цусаа цэвэр авч явъя. Хүн шиг амьдрах, эзэн шиг амьдрах эсэх нь зөвхөн монгол хүн танаас өөрөөс тань шалтгаална.

            Ардчилсан Нам Монголд хоноод явах гэж ирсэн хоноц биш. Хэдэн сар ажиллаад азаа үзэх гэсэн албан тушаалтан биш. Ардчилсан Нам Монголын ардчилсан түүхэнд Тэмүүжинтэй, Чингистэй хамт ирсэн юм. Ардчилсан нам Монголчуудынхаа дундаас дээрээ таван хошуугүй, босоо соёмботой хөх тугтай, эх орныхоо бие даасан байдалтай, эрэмгий монголчуудынхаа эрх чөлөөтэй цуг ирсэн нам. АРДЧИЛСАН НАМ ШИНЭ МОНГОЛЫН ШИНЭ МӨРӨӨДӨЛТЭЙ ЧАЦУУ НАМ.

Ардчилсан Нам Монголд эрх чөлөөнд, боломжид суурилсан шинэ хөгжлийг цогцлоож чадна. Монгол бол шилжилт хийж байгаа орон биш. Шинээр төрж байгаа нийгэм. Шинэ нийгмийн тулгамдсан асуудалд Ардчилсан Нам шийдэл олж чадна. Бид энэ ажлыг хийж чадна. Бид хийхгүй бол өөр хэн хийх юм бэ! Бид хийх ажлаа 10 жилээр төлөвлөж байгаа. Удахгүй гарах Цагаан сарын босгон дээр Ардчилсан Нам ирэх 10 жилд хийх ажлынхаа үндсэн чиглэлүүдийг ард түмэндээ зарлана.

            Монголд өнөөдөр зүүний ч бодлого хэрэггүй. Монголд өнөөдөр барууны ч бодлого хэрэггүй. Монголд өнөөдөр зөв бодлого л хэрэгтэй. Монголчуудад өнөөдөр зөвхөн зөв сонголт л хэрэгтэй. ЗӨВХӨН ЗӨВ БОДЛОГО, ЗӨВХӨН ЗӨВ СОНГОЛТ Л МОНГОЛЫГ ӨӨД ТАТНА.

Бидэнд цаашид хувьсгалын гурав дахь шат  хэрэггүй. Хувьсгалыг алдах юмгүй хүмүүс л хийдэг. Хувьсгалынхаа хоёр дахь шатанд бүгдээрээ алдах юмаа олж авъя. Ажил хөдөлмөрөө олж авъя. Эрхээ олж авъя. Үйлдвэрээ босгож авъя. Өмч хөрөнгөтэй болъё. Ингээд бүгдээрээ нэр бүтэн, нүүр бардам амьдралыг Монгол нутагтаа цогцлооё.

 Хувьсгалынхаа хоёр дахь шатанд БҮГДЭЭРЭЭ ДУНДАЖ, ДУНДЖААС ДЭЭГҮҮР АМЬДРАЛТАЙ БОЛЦГООЁ. Бидэнд хувьсгалын гурав дахь шат хэрэггүй. Эх орноо бид алдаж болохгүй. Эрх чөлөөгөө бид алдаж болохгүй. Ингэж зовж, зүтгэж бүтээсэн амьдралаа Монголчууд алдаж болохгүй.

            Энэ өглөө, энэ 2008 оны эхний шинэ өглөө би Монголоо бодож сэрлээ. Монгол минь биднийг дуудаж байна гэж бодож сэрлээ. МОНГОЛ БОЛ ХҮҮГЭЭ, ОХИНОО ДУУДДАГ ЭХ ОРОН. Өнөөдөр Монголд ч, хилийн чанадад ч байгаа Монголчууд Монголынхоо дуудлагаар сэрж байгаа. Би энэ үгийг хэлэх гэж, энэ мэндчилгээг 2008 оны энэ шинэ өглөө хэлэх гэж сэрлээ. 

МИНИЙ МОНГОЛ МӨНХ ОРШИГ.

           

2008.01.01.

 

Цахиагийн ЭЛБЭГДОРЖ