АНУ-ын Конгрессийн Ардчиллыг дэмжих комиссын шугамаар Монгол Улсад айлчилж байгаа АНУ-ын Конгрессийн гишүүд өнөөдөр Монгол Улсын Ерөнхийлөгчид бараалхлаа.
Төлөөлөгчдийн тэргүүн, АНУ-ын Конгрессийн Төлөөлөгчдийн тахимын гишүүн ноён Дэвид Прайс, ардчилсан, шударга сонгуулиар ард түмнээсээ сонгогдож Ерөнхийлөгч болсонд дахин баяр хүргэе гэлээ.
Монгол Улс гуравдагч хөрштэйгээ найрсаг хамтын ажиллагаагаа ямагт хадгалж, харилцаа өргөжин хөгжиж байгааг Америкийн хууль тогтоох байгууллага өндөр үнэлдэг. Олон улсын энхийг сахиулах ажиллагаанд Монгол Улс идэвхтэй оролцож байдагт баярлаж байгаагаа ноён Дэвид Прайс илэрхийлээд, Мянганы Сорилын Сангийн төсөл Монгол Улсын хөгжилд чухал хувь нэмэр болно гэж найдаж байгаа билээ гэлээ.
Тус орны хөрөнгө оруулагчид Монголын уул уурхайн салбарт хөрөнгө оруулах сонирхолтой байдгийг батлаад, Оюу толгойн гэрээ батлагдахыг харж хүлээж байна гэсэн юм.
Хариуд нь Монгол Улсын Ерөнхийлөгч Ц.Элбэгдорж, Монгол Улсын ардчиллыг Америк улс, америкийн ард түмэн анхнаас нь дэмжиж ирсэнд талархдаг гээд, энэ харилцааг өргөжүүлэхэд өөрийн зүгээс хичээж ажиллах болно гэсэн юм.
Монгол Улсад ажилгүйдлийг бууруулж, мэргэжилтэй боловсон хүчин бэлтгэхэд Мянганы Сорилын Сангийн төсөл цагаа олсон сайн дэмжлэг болох учиртай.
АНУ-д сурч боловсрол эзэмших хүсэлтэй залуусын тоо улам бүр нэмэгдэж байгаа, энэ хүсэл эрмэлзлийг дэмжих болно гэж Ерөнхийлөгч ярилаа. Монголын ардчилал, эдийн засгийн хөгжлийг дэмжиж байгаагийн тод илрэл нь хэдхэн хоногийн өмнө батлагдсан 192 дугаар тогтоол боллоо гээд АНУ-ын Сенатад талархал илэрхийлэхийг хүслээ.
Конгрессийн гишүүд, уул уурхайн салбарын хөрөнгө оруулалт, Хойд Солонгосын асуудал, Монгол Улсын Ерөнхийлөгчийн гаргасан анхны зарлиг, боловсролын салбарын солилцоо зэрэг асуудлаар сонирхсон асуултандаа хариулт авлаа. Конгрессийн Ардчиллыг дэмжих комисс нь дэлхийн залуу шинэ ардчилсан орнуудтай хамтран ажилладаг бүлэг юм байна.
