Эх болсон байгаль дэлхий, унасан газар, угаасан усаа хайрлан хамгаалах, ард иргэдийнхээ эх оронч үндэсний үзлийг сэргээн бадраах, экологийн зөв хүмүүжил, ухамсар төлөвшүүлэхэд Монголчуудын эртний өвөрмөц содон уламжлалын нэгэн болох уул овоог тайн тахиж ирсэн ёс заншил чухал үүрэг гүйцэтгэсээр ирсэн билээ. Үүний нэг тод илрэл нь баруун Монголын ард түмний олон зуун жилийн туршид үе дамжин шүтэж, шүтээн болгон залбирч ирсэн Алтан Хөхий уул, түүний Өндөр хөхийн овооны тайлга тахилгын ёслол юм. Эртнээс нааш үйлдэж ирсэн энэхүү эрхэм нандин уламжлалаа улам бүр бататган дэлгэрүүлж, төрийн тахилгын ёслолын хэмжээнд ёслон үйлдэж байх талаар гаргасан нутгийн ард олны санал, санаачилга, түүний илэрхийлэл болсон нутгийн өөрөө удирдах байгууллагуудын шийдвэр, хүсэлтийг харгалзан үзэж Үндсэн хуулийн 34 дүгээр зүйлийн 1 дэх заалтыг үндэслэн ЗАРЛИГ буулгах нь:
1. Алтан Хөхий уулыг төрийн тахилгатай уул болгож, уулын тэнгэрийг тайх төрийн ёслолыг 4 жилд нэг удаа үйлдсүгэй.
2.Энэхүү зарлиг бууж байгаатай холбогдуулан Монгол Улсын Ерөнхийлөгчийн 2004 оны 57 тоот зарлигаар баталсан "Төрийн тахилгатай уул овооны тэнгэрийг тайх тахилгын ёслолын журам"-ын 1.1 -д "Богдхан хайрхан УУл" гэсний дараагаар "Алтан Хөхий уул" хэмээн нэмж оруулсугай.
3. Тахилгын ёслолыг үйлдэхдээ тайлга тахилгын ёс журмаа баримтлан, эцэг өвгөдийнхөө уугуул зан заншил, уул овоог тайн тахиж байсан түүхэн уламжлал, орчин үеийн соёл, олон түмний дэг жаягийг чандлан дагахыг тус нутгийн ард олон, Алтан Хөхий уулаа шүтэн бишрэгч нийт иргэдэд уриалсугай.
МОНГОЛ УЛСЫН | НАЦАГИЙН БАГАБАНДИ |
ХУУЛБАР ҮНЭН. | Б.Очирбат |
