Монголчуудын эртний өвөрмөц нандин уламжлал болох уул овоог тайн тахиж ирсэн ёс заншил нь эх болсон байгаль дэлхий, унасан газар, угаасан усаа хайрлан хамгаалах, нутаг дэвсгэрийнхээ бүрэн бүтэн байдлыг бататган бэхжүүлэх, ард иргэдийнхээ эх оронч үндэсний үзлийг сэргээн бадраах, экологийн зөв хүмүүжил, ухамсар төлөвшүүлэх үйлдлэг сэтгэлгээг агуулдгаараа нэн чухал ач холбогдолтой билээ. Эртний түүх соёл, ёс заншил, төрт ёсны энэ эрхэм уламжлалыг даган баримталж, нутгийн ард олны санал, санаачлагыг харгалзан үзэж Үндсэн хуулийн 34 дүгээр зүйлийн 1 дэх заалтыг үндэслэн ЗАРЛИГ буулгах нь:
1. Дарьгангын Дарь овоог эдүгээ цагийн байдал, уламжлал, шинэчлэлийн шаардлагад нийцүүлэн тахиж тайх талаар олон түмнээс гаргаж байгаа санал санаачлагыг дэмжсүгэй.
2. Тахилгын ёслолыг үйлдэхдээ төр, шашин, иргэний нийгмийн оролцоог аль болох нийтгэн хангаж, эцэг өвгөдийнхөө уугуул ёс заншил, уул овоог тайн тахиж байсан түүхэн уламжлал, орчин үеийн соёл, олон түмний дэг журмыг чандлан дагахыг нутгийн ард олон, Дарь овоог шүтэн бишрэгч нийт иргэдэд уриалсугай.
МОНГОЛ УЛСЫН | НАЦАГИЙН БАГАБАНДИ |
ХУУЛБАР ҮНЭН: | Б.ОЧИРБАТ |
