Алтай ханы тэнгэрийг тайх төрийн ёслолд оролцохоор хүрэлцэн ирсэн зочид гийчид ээ,
Эрх чөлөөт Монгол орны хийморь золбоот ард иргэд ээ,
Өлзий учрал бүрдсэн энэ сайхан өдөр Хан буурал Алтайн хамгийг тольдогч оргилуудын нэг Алтан Хөхий уулын эртний тахилгат их овоон дээрээс Та бүхнийхээ түмэн амгаланг айлтгаж, сайн сайхан бүхнийг хүсэн мэндчилье.
Ардчиллын бүлээн салхи хөх Монголын тал нутгийг маань ивээж Монголын төр уламжлалт зан заншил, шашин соёлоо дэгжээх талаар олон ажил хийсний нэг нь уул овооныхоо тэнгэрийг тайх өнө эртний ариун ёслол, заншлаа сэргээсэн явдал юм.
Бидний өвөг дээдэс нүүдлийн амьдралын хэв маягт нийцүүлэн байгаль эхээ сүслэн дээдэлж, хүн болон байгалийн хүйн холбоог ухаарч, хөрс шороо, уул ус, ургамал, амьтнаа зүй зохистой ашиглан хамгаалах амьдралын арга ухаан, соёл, сэтгэлгээг бий болгож, түүнийгээ сахин дагаж, бэхжүүлэн хөгжүүлсээр ирсний нэгээхэн тод жишээ нь уул овооны тэнгэрийг тайх ёслол, зан үйл мөн.
Энэ жил төрийн тахилгат гурван хайрхны тэнгэрийг тайх ёслолыг үйлдэхээр төлөвлөгдсөнөөс эхнийнх нь гурван аймгийн уулзварт орших Алтан Хөхий уулын тэнгэрийг тайх ёслол болой.
Миний бие Монгол төрийн тэргүүний хувьд эртнээс нааш эв найртай идээшин амьдарсаар ирсэн олон ястнуудын омог сүрийг тэтгэж, нутаг ус, аймаг сум, улс монголынхоо төлөө гэсэн нэгэн үзүүрт сэтгэлээр хамтран ажиллах их урам зоригийг минь улам бадрааж байхыг байгаль эхийн хүү - Алтан Хөхий уулынхаа тэнгэрт сүсэглэн даатгаж байна.
Олон бүгдээрээ онгод сахиус, уул усны эздээ аргадан тайж, их хайрханыхаа өмөг түшигт итгэн сүсэглэе.
Хуран цугласан Монгол ахан дүүсээ,
Манай Улс байгалийн онгон байдлаа харьцангуй хадгалж чадсан дэлхийн цөөхөн улсын нэг боловч сүүлийн жилүүдэд эх орны ариун дагшин байгаль, тунгалаг гол мөрөн, ой тайга, ургамал амьтан, уужим тал нутаг маань урт гартай ухвар мөчид хүмүүсийн урагшгүй, хариуцлагагүй ажиллагааны золиос болон сүйдэж байгааг харж, тайван суух аргагүй болоод байна. Энэ аюул заналхийллээс байгаль, амьдрах орчноо хамгаалахад төр, засгийн тогтвортой, үр нөлөөтэй бодлого шийдвэрээс гадна манай иргэн бүрийн идэвхи оролцоо нэн чухал юм.
Алтай нутгийн ард түмний эх оронч үзлийн онгодыг хөглөн төрөлх газар шороогоо хайрлан хамгаалах сэдэл, үйлдлийн эрч хүчийг хуримтлуулж, байгаль эхээ гэх сэтгэл зүтгэлийг улам улам хөгжөөн бадраахад энэхүү тахилгын ач холбогдол оршино хэмээн бодож байна.
Төрийн тахилгат Алтан Хөхий хайрханы гэгээн тэнгэр түмэн олныг маань ивээж, түүхт их улсын минь төрийн мэргэн бодлого, түмний хичээл зүтгэлээр уугуул нутаг усны сав, шимийн жам ёс зохилдон, улс Монгол, ард иргэдийн аж амьдрал өөдлөн дэвжих болтугай.
Хурай, Хурай, Хурай.
