Монгол Улсын Ерөнхийлөгчийн мэндчилгээ
“Их эрдэмтэн Цахар гэвш Лувсанцүлтим хийгээд Монголын уламжлалт анагаах ухаан, одон зурхайн шүтэлцээ” сэдэвт олон улсын эрдэм шинжилгээний бага хуралд оролцогсдод
Дундад зууны үеийн их эрдэмтэн, нэрт орчуулагч, яруу найрагч Цахар гэвш хэмээн олонд алдаршсан Лувсанцүлтимийн мэндлэсний 270 жилийн ойд зориулан зохион явуулж буй олон улсын эрдэм шинжилгээний бага хуралд оролцож байгаа Та бүхэнд мэндчилгээ дэвшүүлэх ялдамд хурлын үйл ажиллагаанд амжилт хүсье.
Цахар гэвш нь XYIII зууны үеийн орчуулгын түүхэнд өөрийн өвөрмөц өнгө төрхтэй шинэчлэлийг хийсний дээр монголын уламжлалт анагаах ухаан, одон зурхай, буддын гүн ухаан, дуун ухааны чиглэлээр асар их үнэ цэнэтэй бүтээл туурвисан нь өдгөө үед түүний арван боть бүрэн зохиолоор нь уламжлан иржээ.
Тэрбээр дундад зууны нүүдэлчин монголчуудыг гэгээрүүлэх, суурин соёл иргэншлийн дэвшилт зүйлээс нэвтрүүлэхийг чармайж, өөрийн үүсгэн байгуулсан Цахарын Цагаан уулын сүмд модон барын хэвлэлийн газар байгуулсан нь тухайн үедээ соёл, шинжлэх ухааны том дэвшил болж байсныг өнөөгийн бид бахархан тэмдэглэх ёстой билээ.
Цахар гэвш нь буддын гүн ухааны асар өндөр боловсролтой их сэтгэгч байсны хувьд одоогоос хоёр зуу гаруй жилийн тэртээ феодалын нийгмийн бурангуй нөхцөлд хүний эрх, эрх чөлөө зөрчигдөж байгааг шүлэг найрагтаа хурцаар шүүмжилж байсныг манай эрдэмтэд цааш нь улам гүнзгийрүүлэн судалж, түүний шүлэг зохиол дахь цоглог сайхан мөр бадгуудыг нийтийн сонорт хүргэх нь зүйд бүрнээ нийцнэ хэмээн Төрийн тэргүүн миний бие үзэж байна.
Та бүхэн энэ хурлаараа Лувсанцүлтимийн олон талт бүтээл туурвилын талаар шинэ шинэ санал дэвшүүлж, Цахар гэвш судлалын үйлст дорвитой хувь нэмэр оруулна гэдэгт итгэлтэй байна.
Сайн үйлс бүхэн дэлгэрэх болтугай.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
Улаанбаатар, 2010 оны 8 дугаар сарын 25
Монгол Улсын Ерөнхийлөгчийн мэндчилгээ
