Япон Улсын Гадаад хэргийн сайдыг хүлээн авч уулзав
Манай улсад айлчилж байгаа Япон Улсын Гадаад хэргийн сайд К.Окада өнөөдөр Монгол Улсын Ерөнхийлөгч Ц.Элбэгдоржид бараалхлаа.
Ерөнхийлөгч Ц.Элбэгдорж ярианыхаа эхэнд Монгол, Японы харилцаа манай улсын гадаад бодлогын тэргүүлэх чиглэлийн нэг болохыг дурдаад Япон Улстай хөгжүүлж буй харилцаа, хамтын ажиллагаанд Монголын төр засаг өндөр ач холбогдол өгдгийг онцлон тэмдэглэв.
“Монгол Улсад ардчилал шинэчлэлийг хөгжүүлэхэд Япон Улсын Засгийн газар, ард түмний зүгээс өгсөөр ирсэн зээл тусламж чухал үүрэг гүйцэтгэдэг. Цаашдаа бид хоёр орны иж бүрэн түншлэлийн харилцааг шинэ шатанд гаргах сонирхолтой байна” хэмээн Ерөнхийлөгч хэллээ.
Эдийн засгийн түншлэлийн хэлэлцээр байгуулах асуудлаар Монгол, Японы Засгийн газар, хувийн хэвшил, судлаачдаас бүрдсэн хамтарсан судалгааны хэсэг ажиллаж буйд талархаж байна. Энэ нь манай орны хувьд гадаад улс оронтой байгуулах эдийн засгийн томоохон хэлэлцээрийн нэг болох юм. Монгол оронд японы хөрөнгө оруулалт нэмэгдэж, байгаль орчинд ээлтэй шинэ үеийн техник технологи нэвтрэх өргөн боломж байна гэж Ерөнхийлөгч Ц.Элбэгдорж ярив.
Монгол Улсын Засгийн газрын урилгаар хийж буй энэхүү айлчлал хэдийгээр цаг хугацааны хувьд давчуу ч хоёр орны харилцааг хөгжүүлэхэд юу хийх боломжтойг судалж мэдэх үр дүнтэй айлчлал болно гэж найдаж байгаагаа Япон Улсын Гадаад хэргийн сайд К.Окада, илэрхийллээ. “Манай хоёр орны харилцааг шинэ шатанд гаргах боломжтой гэж Таны хэлсэнтэй бид санал нэг байна. Энэ асуудлаар Гадаад харилцааны сайд нарын түвшинд ярилцаж байгаа. Эдийн засгийн түншлэлийн хэлэлцээрийг байгуулах нь бидний хувьд зөвхөн эдийн засгийн төдийгүй, бусад бүх салбарын харилцаа, хамтын ажиллагааг дэмжсэн чухал баримт бичиг болно гэдэгт эргэлзэхгүй байна” гэж тэрбээр тэмдэглэсэн юм.
Уулзалтын үеэр бүс нутаг, олон улсын талбар дахь хамтын ажиллагааны талаар товчхон санал солилцлоо. НҮБ-ын ажиллагаанд Япон Улсын оруулж ирсэн хувь нэмэр өндөр болохыг Ерөнхийлөгч үнэлээд, Аюулгүйн Зөвлөлийн байнгын гишүүнээр элсэх хүчин чармайлтыг Монгол Улс дэмжиж байгаа гэдгийг дахин нотлов.
Япон Улсын Гадаад хэргийн сайдын Монгол Улсад хийж байгаа айлчлал амжилттай болно гэдэгт итгэлтэй байгаагаа уулзалтад оролцсон талууд харилцан илэрхийллээ.
Япон Улсын Гадаад хэргийн сайдыг хүлээн авч уулзав
