Монгол Улсын Ерөнхийлөгч Ц.Элбэгдорж өнөөдөр Хойд Америк -Монголын Бизнесийн Зөвлөлийн Ерөнхийлөгч Стив Сандерсыг хүлээн авч уулзлаа.
Ноён Стив Сандерс Зөвлөлийнхөө өмнөөс болон хувиасаа Монгол Улсын Ерөнхийлөгчөөр сонгогдсон Танд баяр хүргэе гээд, Монголын ард түмэн ардчиллаа баталгаажуулсан гайхалтай сонголт хийсэн гэж дүгнэж байгаагаа илэрхийллээ.
Хойд Америк, Канадын хөрөнгө оруулагчид болон бизнес эрхлэгчидийн хувьд монгол улсад хөрөнгө оруулах, хамтран ажиллах сонирхол улам бүр нэмэгдэж байгаа. Монгол улс шиг зах зээлийн эдийн засагтай, хүний эрх эрх чөлөөг дээдэлсэн ардчилсан тогтолцоотой орнуудтай хамтран ажиллахад ямагт амар хялбар байдгийг тэрээр мөн дурдсан юм.
“Хөрөнгө оруулагчид өнөөдөр Оюутолгойн гэрээг анхааралтай ажиглаж хүлээж байгаа. Энэ гэрээ бусад олон хөрөнгө оруулалт, хамтын ажиллагааг дагуулах том төсөл учраас харилцан тохиролцоонд хүрч сайн гэрээ батлагдана гэж найдаж байна” гэж ноён Стив Сандерс хэллээ.
Ерөнхийлөгч Ц.Элбэгдорж, Монгол Улс Хойд Америкийн хооронд ашигт малтмал, уул уурхайн төдийгүй бусад салбарт хамтын ажиллагаа өргөжиж байгаад танай Зөвлөлийн хувь нэмэр их гээд, Оюутолгойн гэрээг цаг алдалгүй яаралтай батлах ёстой гэсэн байр суурьтай байгаагаа илэрхийллээ.
“Оюутолгой бол Монгол Улс нийгмийн тогтолцоогоо өөрчилснөөс хойш хийгдэх гэж байгаа анхны том төсөл.
Энэ гэрээний араас бусад олон том төслүүд хүлээгдэж байгаа.
Монгол орны хувьд энэ бол эдийн засгийн том боломж” гэж Ерөнхийлөгч дүгнэсэн.
Монгол орны ардчилал, эдийн засаг, хөрөнгө оруулалтын орчин болон бусад цаг үеийн асуудлаар Ерөнхийлөгч Ц.Элбэгдорж, ноён Стив Сандерс нар харилцан санал бодлоо солилцлоо.
