Франц улсаас Монгол Улсад суух Онц бөгөөд Бүрэн Эрхт Элчин Сайд ноён Жан Пол Дүмон өнөөдөр Монгол Улсын Ерөнхийлөгч Цахиагийн Элбэгдоржид итгэмжлэх жуух бичгээ барилаа.
Ерөнхийлөгч, ноён Ж.П.Дүмоныг манай улсад суух элчин сайдаар тохоон томилогдсонд баяр хүргээд Монгол улс нь Европын Холбоо, түүний дотор Франц улсыг өөрийн гуравдагч хөрш гэж гэж үздэг болохыг дахин нотоллоо.
Монгол улс Францын Ази дахь итгэмжлэгдсэн түнш болох зорилго тавин, найрсаг харилцаа хамтын ажиллагааг хөгжүүлэхэд ач холбогдол өгдөг гэж МУ-ын Ерөнхийлөгч хэллээ.
Тэрээр мөн хоёр орны хооронд бүх салбарт хамтын ажиллагааг өргөжүүлэхэд өөрийн зүгээс анхаарч ажиллахаа илэрхийлсэн.
Монгол Франц орнуудын хооронд өндөр дээд хэмжээний айлчлалууд тогтмолжиж байгаа бөгөөд, энэ давтамжийг хадгалах нь цаашдын харилцаанд чухал болохыг онцоллоо.
Франц Улсаас Монгол Улсад суух Онц бөгөөд Бүрэн Эрхт Элчин Сайд ноён Ж.П.Дүмон, Ц.Элбэгдоржийг Монгол Улсын Ерөнхийлөгчөөр сонгогдсонд Ерөнхийлөгчийнхөө болон Засгийн газрынхаа өмнөөс баяр хүргэе гээд, Ерөнхийлөгч Никола Саркозигийн мэндчилгээг гардуулан өглөө.
“35 жилийн дараа би Монголд дахин ирж байгаадаа баяртай байна. Их зүйл өөрчлөгдсөнийг, Монгол орон амжилтанд хүрснийг өөрийн нүдээр харлаа. Цаашдаа энэ харилцааг өргөжүүлэхийн төлөө хичээн ажиллах болно” гэж ноён Ж.П.Дүмон ярив.
Сүүлийн жилүүд манай хоёр орны харилцаа соёл боловсрол, уул уурхай, худалдааны салбаруудад идэвхтэй хөгжиж байна. 2008 оны байдлаар нийт худалдааны эргэлт 63.9 сая ам доллар байна. Монгол улсад хөрөнгө оруулсан францын компанийн тоо 32-д хүрчээ.
Уул уурхайн салбартаа Европт тэргүүлэгч технологитой “Арева” компани манай улсын ураны салбарт ажиллаж байна. Мөн эрүүл мэнд, боловсрол, соёлын чиглэрээр хөрөнгө оруулалтууд нэмэгдэж байгаа юм.
Франц Улсаас Монгол Улсад суух Онц бөгөөд Бүрэн Эрхт Элчин Сайд Ж.П.Дүмон нь 1971-1975 онуудад Улаанбаатарт ЭСЯ-нд ажиллаж байсан, гадаад хэргийн Дээд ангийн зөвлөх цолтой, дорно дахинаар мэргэшсэн дипломат юм байна.
