Хэлмэгдэгсдэд буцалтгүй тусламж гардуулав
Улс төрийн хилс хэрэгт хэлмэгдэгсдийн дурсгалыг хүндэтгэх өдөр удахгүй болох гэж байгаатай холбогдуулан хэлмэгдэгсэд, тэдгээрийн гэр бүл, хүүхдийн төлөөлөл 20 хүнд Монгол Улсын Цагаатгах ажлыг удирдан зохион байгуулах улсын комиссын даргын захирамжаар нэг удаагийн буцалтгүй мөнгөн тусламж олгохоор шийдвэрлэсэн юм.
Монгол Улсын Ерөнхийлөгчийн Тамгын газрын дарга, Цагаатгах ажлыг удирдан зохион байгуулах улсын комиссын гишүүн Д.Баттулга хэлмэгдэгч Г.Жамъян, Б.Нямдарь, хэлмэгдэгсдийн гэр бүл Б.Чулуун, Д.Жавзан, хэлмэгдэгсдийн үр хүүхэд Д.Дуламсүрэн, Д.Авирмэд нарын нэр бүхий хүмүүст нэг удаагийн буцалтгүй тусламжийн мөнгийг өнөөдөр гардуулж өгөв.
Өнгөрсөн он жилүүдийн хэлмэгдүүлэлтийн хар өдрүүдийг та бүхэн давсан ч амссан хүнд зовлон шарх эдгэрээгүйг ойлгож байна. Одоогоор хилсээр хэлмэгдээд цагаадсан 17376 хүнд, тодруулбал хэлмэгдэгсэд, тэдгээрийн гэр бүл, үр хүүхдэд 16,3 тэрбум төгрөг нөхөн олговор болгон олгоод байгаа билээ. Удахгүй есдүгээр сарын 10-нд хилс хэрэгт хэлмэгдэгсдийн дурсгалыг хүндэтгэх өдөр болно. Энэ өдөр тэдний гэгээн дурсгалыг хүндэтгэнэ.
Тэр хар өдрүүд дахин давтагдахгүйн баталгаа бол өнөөдрийн олон намын төр барих систем юм. Эцэст нь тийм өдрүүд бүү давтагдаасай хэмээгээд та бүхэнд хамгийн сайн сайхныг хүсэн ерөөе гэж Монгол Улсын Ерөнхийлөгчийн Тамгын газрын дарга, Цагаатгах ажлыг удирдан зохион байгуулах улсын комиссын гишүүн Д.Баттулга хэллээ.
Буцалтгүй тусламж хүртэгсдийг төлөөлж хэлмэгдэгч Г.Жамъян тус комисст талархсанаа илэрхийлэв.
Хэлмэгдэгсдэд буцалтгүй тусламж гардуулав
