Хүний эрхийн төлөө тэмцэгчидтэй уулзав
Монгол Улсын Ерөнхийлөгчийн Тамгын газрын дарга Д.Баттулга Узбекстаны Ташкент хотноо цаазаар авах ял, эрүүдэн шүүхийн эсрэг эхчүүдийн хөдөлгөөнийг үүсгэн байгуулсан Тамара Чикунова, Италийн Сант-Эжидио нийгэмлэгийн Төв Ази, Зүүн Европын хүний эрхийн асуудал, хариуцсан зохицуулагч Стефано Аржентино Сторино нарыг өнөөдөр хүлээн авч уулзав.
Монгол Улсын Ерөнхийлөгч цаазаар авах ялыг түдгэлзүүлснийг та бүхэн дэмжин, манай орныг зорин ирсэнд Ерөнхийлөгчийн Тамгын газар машид талархаж байна. Эмнести Интернэшнл болон бусад олон улсын байгууллага Монгол Улсын энэ алхмыг дэмждэг. Ерөнхийлөгчийн энэ санаачилгыг ажил хэрэг болгох үүднээс холбогдох хуулиудад өөрчлөлт оруулах хуулийн төслүүдийг боловсруулж Улсын Их Хуралд өргөн бариад байгаа. Монгол Улсын Их Хурал нааштай шийднэ гэдэгт итгэж байна.
Та бүхэн Дундад Азийн болон бусад оронд эл ялыг халсан туршлагаас уулзсан хүмүүсдээ ярьж, бодит мэдээлэл өгнө байх гэж найдаж байна. Монгол Улс энэ ялыг хүчингүй болговол Азийн олон оронд үлгэр дууриал болно гэж Ерөнхийлөгчийн Тамгын газрын дарга Д.Баттулга хэллээ.
Хатагтай Тамара, ноён Стефано нар манай улсын Ерөнхийлөгчийн санаачилгыг дэмжиж байгаагаа, мөн энэ ялыг түдгэлзүүлээд зогсохгүй хүчингүй болгоно гэдэгт итгэж байгаагаа илэрхийлээд Дундад Азийн Киргиз, Узбекстан, Казахстан зэрэг орнуудын алдаа онооны жишээнээс дурдан ярив.
Хүний эрхийн төлөө тэмцэгчидтэй уулзав
