Монголын уур амьсгалын өөрчлөлтийн 2080 он хүртлэх загварчлал
“Монгол орны уур амьсгалын өөрчлөлтийн 2080 он хүртлэх загварчлал” сэдэвт судалгааны ажлын танилцуулга 2010 оны 9 дүгээр сарын 8-ны 10 цагт Монгол Улсын Ерөнхийлөгчийн Тамгын газрын “Иргэний танхим”-д өнөөдөр боллоо.
Танилцуулгыг АНУ-ын Вашингтоны их сургуулийн дэд профессор, “The Nature Conservancy” ТББ-ын “Дэлхийн уур амьсгалын өөрчлөлт хөтөлбөр”-ийн ахлах судлаач Эван Гивэртс хийв.
Энэ арга хэмжээг Монгол Улсын Ерөнхийлөгчийн Байгаль орчин, амьдрах орчны бодлогын зөвлөх Э.Зоригт нээн, TNC ТББ-ын уур амьсгалын өөрчлөлтийн нөлөөллийн талаар хийсэн судалгааны ач холбогдлыг дурдаж яриад гадаад, дотоодын судлаачдын эл чиглэлээр хийсэн ажлыг олон нийтэд танилцуулахад Тамгын газрын “Иргэний танхим”-ын үүд хаалга үргэлж нээлттэй байх болно гэлээ. Тэрээр цааш нь хэлэхдээ уг ажил нь Монгол орны зүүн хэсгийн тал хээр нутаг дахь уур амьсгалын өөрчлөлтийн өнөө ба ирээдүйн төлөв байдал, байгаль орчин, иргэдийн амьжиргаанд үзүүлэх нөлөөллийн талаарх TNC ТББ-ын суурь судалгаа болон монголчуудын олон мянган жил байгаль орчинтойгоо дасан зохицож амьдарч ирсэн туршлага дээр тулгуурласныг тэмдэглээд уур амьсгалын өөрчлөлт цаашид ч үргэлжлэх учраас бэлчээрийн мал аж ахуй эрхлэн амьдардаг манай орны иргэд хүрээлэн буй орчныхоо онцлогт тулгуурлан түүнд дасан зохицож амьдарч болох талаар саналаа илэрхийллээ.
Танилцуулгын дараа АНУ-ын эрдэмтэн Эван Гивэртс хүмүүстэй санал солилцож, тавьсан асуултад хариулж харилцан ярилцав.
АНУ-ын эрдэмтэн Эван Гивэртсийн судалгааны ажлын танилцуулгад Монгол Улсын Ерөнхийлөгчийн Тамгын газрын урилгаар Байгаль орчин, экологийн чиглэлээр үйл ажиллагаа явуулдаг төрийн болон төрийн бус байгууллагуудын төлөөлөгчид, эрдэмтэн судлаачид, сонирхогчид оролцлоо.
Танилцуулгыг МҮОНТ, Монгол ТВ, ТВ-5, SBN, С1 телевиз, төвийн зарим сонины сэтгүүлчид сурвалжлахаар ирсэн байв.
Монголын уур амьсгалын өөрчлөлтийн 2080 он хүртлэх загварчлал
