Монгол Улсын Ерөнхийлөгчийн илгээлт
“Дисковер Монголиа” Уул уурхайн салбарт хөрөнгө оруулагчдын чуулга уулзалтын зочид төлөөлөгчдөд
Найман намар дараалан Монгол Улсын нийслэлд хуран цугларсан эрхэм геологич, уурхайчин, хөрөнгө оруулагч, бизнес эрхлэгчид та бүхний энэ удаагийн уулзалтад амжилт хүсэн мэндчилье.
Монгол Улсын өргөн уудам нутагт эрэл хайгуул хийж, нээн илрүүлсэн орд газартаа ихээхэн бүтээн байгуулалт өрнүүлж ирсэн та бүхний ажил үйлс, хичээл зүтгэлийг Монголын төр сайн мэднэ. Та бүхний хөрөнгө хүч, нөр их хөдөлмөрийн үр дүнд бид дэлхийн хэмжээнд томоохонд тооцогдох орд газруудыг нээн, эдүгээ тэдгээр орддоо түшиглэн нийгэм-эдийн засгийн бүтээн байгуулалтыг эхлүүлээд байна.
Дэлхийд тэргүүлэгч мэргэжилтэн та бүхнийг дагаад Монголд шинэ мэдлэг, тэргүүний техник технологи, дэлхийн хамгийн шилдэг туршлага, ур чадвар ирж байгаа. Өнгөрсөн намар Монгол Улс та бүхэнтэй хамтран нэгэн алхам урагшилсан. Цаашдаа бид ийм олон алхамуудыг хийх болно. Оюу толгойн гэрээг хэлэлцэж батлах үйл явцад олон жил зарцуулсан боловч Монгол Улс чамгүй олон шинэ зүйл сурсан. Сайн, саар туршлагаасаа ч бусадтай хуваалцах болно.
Энэ оны нэгдүгээр сард Швейцарын Давос хотноо чуулсан Дэлхийн эдийн засгийн чуулга уулзалтын үеэр би эрдэс баялгийн салбарынхантай тусгайлан уулзаж ярилцсан билээ. Тэр үеэр орд ашиглах хөрөнгө оруулалтын загвар гэрээ байгуулах санаа дэвшүүлснийг маань Давосын чуулга уулзалт талархан хүлээн авч, дэлхийн хэмжээнд жишиг болон ашиглагдах хөрөнгө оруулалтын гэрээний загвар боловсруулах төслийг эхлүүлж, анхны уулзалтаа Монгол Улсад энэ оны 6 дугаар сард Улаанбаатар хотноо зохион байгууллаа. Энэ бас л нэг алхам. Дараа дараагийн уулзалтууд нь эрдэс баялаг арвинтай, түүнийгээ түшиглэн хөгжиж буй дэлхийн бусад орнуудад зохион байгуулагдан, тэдгээр улсын туршлага сургамжаар загвар гэрээг улам баяжуулж, төгөлдөржүүлж, ийнхүү боловсруулсан төслөө ирэх оны 1 дүгээр сард Давосын чуулга уулзалтын үеэр танилцуулах юм. Энэ бол Монгол Улсын дэлхийн уул уурхайн салбарын хөгжилд оруулж буй хувь нэмэр, хүчин чармайлт юм.
Та бүхэнд хандаж онцгойлон сануулах нэгэн чухал зүйл байна. Энэ бол хариуцлагын асуудал. Эрдэс баялаг хайх, ашиглах тусгай зөвшөөрлийн хамт та бүхэнд тусгай хариуцлага давхар ирж буй хэмээн ойлгох нь зүйтэй. Энэ бол нийгмийн өмнө, байгаль дэлхийн өмнө хүлээж буй бид бүхний онцгой хариуцлага юм. Тиймээс орон нутгийн хөгжил, орд газрын нөхөн сэргээлт, байгалийн болон түүхэн дурсгалт газруудыг хамгаалах зэрэг чухал асуудлуудад зохих анхаарал хандуулж, хариуцлагатай ажиллахыг хүсч байна.
Энд нэгэн зүйлийг илүүтэй анхааруулж хэлэе. Монгол Улс байгаль орчинд хамгийн ээлтэй ахуй амьдралтай орон боловч уур амьсгалын өөрчлөлтөд хамгийн хүндээр нэрвэгдэж байгаа орнуудын нэг болоод байна. Тиймээс та бүхэн үйл ажиллагаа явуулж буй нутаг бүртээ байгалийн нөхөн сэргээлтийг стандартын дагуу гүйцэтгэж, өөрсдийн санал санаачилгаар Монгол Улсад мод тарих үйлсэд нэгдэн орохыг уриалж байна.
Төрийн зүгээс хууль эрх зүйн зохицуулалтын орчныг тодорхой, тогтвортой байлгах тал дээр анхаарч ажиллах болно. Монгол Улс ардчилсан орон, тиймээс төрөөс баримтлах бодлого, хууль тогтоомжоо ард нийтээрээ хэлэлцүүлж, ард нийтээрээ шүүн тунгааж байж тунхаглах ёстой. Хайгуулч, олборлогч, хөрөнгө оруулагч та бүхэнтэй нэгэн ойлголцолд хүрч, ард нийтийн санал бодлыг бүрэн дүүрэн тусгаж чадаагүй тийм бодлого, тийм хууль хэрэгждэггүйн жишээг ч бид харж байна. Иймд манай хууль тогтоогчид ч гэсэн энэ тал дээр анхаарч ажиллах биз ээ.
Энд хөндөхгүй өнгөрч боломгүй бас нэгэн асуудлыг тодруулъя. Өнгөрсөн 12 дугаар сард Монгол Улсын төрийн тэргүүний хувьд, Үндэсний аюулгүй байдлын Зөвлөлийн тэргүүний хувьд би хайгуулын тусгай зөвшөөрлийг олгохыг түр зогсоосныг та бүхэн мэдэж байгаа билээ. Геологийн хайгуулын ажлыг тасралтгүй явуулж байх нь аливаа улс орны геологийн мэдээллийн санг байнга баяжуулж байдгийн ач холбогдол, мөн уул уурхайн ашиглалтын тогтвортой, залгамжилсан байдлыг алдагдуулахгүй байх буюу та бүхний ярьдаг хэлээр бол “mining pipeline” циклийг алдагдуулахгүй байх ёстой зарчмыг би огоороогүй ээ. Монголд улсад лиценз олгох үйл явц нээлттэй, ил тод, шударга, тогтвортой байж, лиценз эзэмшигчид хууль ёсыг чандлан, хариуцлагаа ухамсарладаг байдлыг төлөвшүүлэх зорилгоор энэ шийдвэрийг гаргасан билээ. Монголд хүний эрх зөрчигдөх ёсгүй, байгаль эх хэлмэгдэх учиргүй. Хууль гажуудах учиргүй. Авилгал бол хүний эрхийг хамгийн бүдүүлгээр зөрчиж байгаа, ард иргэдийн маань өдөр тутмын амьдралд хэрэглэгддэг талх тарианаас нь хулгайлж, хумсалж байгаа гэмт үйлдэл. Тиймээс, авилгалын үүд хаалгыг нээсэн, лиценз тойрсон гэмт хэрэгтэй би тууштай тэмцэх болно. Энэ тэмцэлдээ та бүхнийг нэгдэхийг уриалж байна.
Уул уурхайн бага хурлаараа та бүхэн олон сонирхолтой сэдвээр илтгэл сонсож хэлэлцэх юм байна. “Дисковер Монголиа” буюу “Монголыг нээцгээе” хэмээх сонсголонтой нэртэй, нэрнээсээ л ахиц дэвшил, бүтээн байгуулалтад уриалсан та бүхний хурлын ажилд өндөр амжилт хүсье. Уулзалтыг олон жил дараалан тууштай зохион байгуулж ирсэн хүмүүс болон үндэсний компаниудад талархал илэрхийлэе.
Монгол Улс нээлттэй, эрх чөлөөтэй орон. Бас хариуцлагатай орон. Чин сэтгэлтэй, бүтээлч, хариуцлагатай хөрөнгө оруулагч та бүхний өмнө Монгол Улсын үүд хаалга нээлттэй байх болно. Та бүхэнд хамгийн сайн сайхан бүхнийг хүсэн ерөөн, хурлын ажилд амжилт хүсье.
Монгол Улсын Ерөнхийлөгч Ц. Элбэгдорж
2010 оны 9 дүгээр сарын 8
Монгол Улсын Ерөнхийлөгчийн илгээлт
