Ерөнхийлөгчийн санаачилгыг дэмжиж байгаагаа илэрхийллээ
Монгол Улсын Ерөнхийлөгч Ц.Элбэгдорж манай оронд зочилж байгаа Узбекстаны Ташкент хотноо цаазаар авах ял, эрүүдэн шүүхийн эсрэг эхчүүдийн хөдөлгөөнийг үүсгэн байгуулсан Тамара Чикунова, Италийн Сант-Эжидио нийгэмлэгийн Төв Ази, Зүүн Европын хүний эрхийн асуудал, хариуцсан зохицуулагч Стефано Аржентино Сторино нарыг өнөөдөр хүлээн авч уулзав.
Уулзах боломж олгосонд Ерөнхийлөгчид талархаад Тамара Чикунова Монгол Улсын Ерөнхийлөгч цаазаар авах ялыг халах санаачилга гарган моратори зарласныг дэмжиж буйгаа илэрхийлж, хуучин зөвлөлтийн бүрэлдэхүүнд байсан Беларусиас бусад бүх улс энэ ялыг хэдийнэ халсныг дурдлаа.
-Монгол оронд хэдэн жил амьдарч байсан болохоор монгол хүмүүсийг сайн мэднэ. Монголчууд хүнлэг энэрэнгүй хүмүүс. Тиймээс Ерөнхийлөгч таны санаачилгыг дэмжиж, Иргэний болон улс төрийн эрхийн тухай олон улсын пактын цаазаар авах ялыг халахад чиглэсэн нэмэлт II протоколд Монгол Улс нэгдэж, холбогдох хуулиуддаа өөрчлөлт оруулан, цаазаар авах ялыг хална гэдэгт итгэж байна. Энэ онд болох амьдралын төлөө хотуудын уулзалтад Улаанбаатарыг оролцуулах бодолтой байна хэмээн Тамара Чикунова ярив.
-Монгол Улсын Их Хурлын чуулган дээр 2010 оны нэгдүгээр сарын 14-нд Ерөнхийлөгч та цаазаар авах ялыг халах талаар үг хэлж, моратори зарласныг Сант-Эжидио нийгэмлэг баяртайгаар хүлээн авч, өөрийн вэб сайтдаа тавин, Европын олон оронд энэ мэдээллийг дамжуулсан. Цаашид ч таны энэ санаачилгыг дэмжиж ажиллана гэж Стефано Аржентино Сторино хэллээ.
Манай орныг зорин ирж, энэ санаачилгыг дэмжиж байгаад Ерөнхийлөгч талархан, хамтарч ажиллахад бэлэн байгаагаа мэдэгдлээ.
Ерөнхийлөгчийн санаачилгыг дэмжиж байгаагаа илэрхийллээ
