Монгол Улсын Ерөнхийлөгч Ц.Элбэгдорж анхны шагналаа өнөөдөр гардууллаа.
Монгол Улсын Ерөнхийлөгчийн зарлигт:
“ Монгол Улсын тусгаар тогтнол, бүрэн эрхт байдлыг бататган бэхжүүлэх, эх орондоо хүмүүнлэг, ардчилсан, иргэний нийгэм байгуулахад оруулсан жинтэй хувь нэмэр, түүхэн гавъяаг нь үнэлж Дашийн Бямбасүрэнг “Чингис хаан” одонгоор шагнасугай” гэсэн байна.
Д.Бямбасүрэн бол Ардчилсан хувьсгал монгол улсад өрнөж байх үед улстөрийн арвин туршлага, мэргэн шийдвэрээрээ Монголын төрд үнэлж баршгүй түшиг тулгуур болсон манай улсын шилдэг улстөрчидийн нэг билээ.
Түүний түүхэн гавъяаг хүндэтгэж, Монгол Улсын Ерөнхийлөгч өөрийн гараар бичсэн хүндэтгэлийн үгээ хадгалууллаа.
“Улс үндэсний их баяр наадам эхэлж байгаа энэ өдөр Дашийн Бямбасүрэнг Монгол Улсын төрийн дээд шагнал-тэргүүн зэргийг одон “Чингис хаан” одонгоор шагналаа.
Д.Бямбасүрэн гуай бол Эх орон, эрх чөлөөндөө жинхэнэ ёсоор эзэн байх гэсэн монгол түмний өнийн хүсэл мөрөөдлийг хэрэгжүүлэхэд түүхэн үүрэг гүйцэтгэсэн хүн. Монголын ард түмний шинэ сонголтын эхлэл, өрнөл, түүний хувь заяа шийдэгдэж байсан эгзэгтэй цаг мөч, он жилүүдэд /хуучнаар/ БНМАУ-ын СНЗ-ийн 1-р орлогч дарга, улмаар Монгол Улсын Ерөнхий сайдаар ажилласан хүн бол Дашийн Бямбасүрэн юм.
Бямбасүрэн гуай бол 1989 оны сүүлч, 1990 оны эхээр улс орон даяар өрнөсөн ардчилсан хөдөлгөөний ариун зорилго, үйл ажиллагааг эхнээс нь тууштай дэмжигч, түүнд идэвхтэй оролцогч нь байсан хүн. Ардчилсан хувьсгалын түүхэн хэлэлцээрүүдийг бодит үр дүнд хүргэхэд онцгой чармайлт гаргасан монгол төрийн зүтгэлтэн. Шинэ тутам эрх чөлөө, ардчилалын замд зориглон орсон улс орныхоо гүйцэтгэх эрх мэдлийг удирдаж байхдаа Бямбасүрэн гуай улс орноо улс төр, эдийн засаг, санхүү нийгмийн цоо шинэ тогтолцоонд шилжүүлж, төр улсын тусгаар тогтнол, бүрэн эрхт байдлыг жинхэнэ утгаар нь сэргээн бэхжүүлэх, Монгол улсын хүн төрөлхтний нийтлэг хөгжлийн замд оруулахад түүхэн гавъяа байгуулж, онцгой хувь нэмэртэй ажилласан.
Бямбасүрэн гуай бол хүний эрх, эрх чөлөө, ардчилал шударга ёс, хөгжил дэвшлийн талд тууштай зогсож, тэдгээр үнэт зүйлсийг нийгмийн амьдралын хэм хэмжээ болгоход үнэлж баршгүй хувь нэмэр оруулсаар байгааг нь бахдан тэмдэглэхэд таатай байна.
Бямбасүрэн гуай бол үе үеийхэнд үлгэр дууриал болсон сайхан буурал.
Танд эрүүл энх байж, урт удаан наслахыг, улам ихийг хийж бүтээхийг хүсэн ерөөе! Цахиагийн Элбэгдорж” гэжээ.
Д.Бямбасүрэн, төрийн дээд шагналаар шагнасан явдалд талархаж байгаагаа Ерөнхийлөгчид илэрхийлээд, “Монголын ард түмэн ардчиллаа дахин бататгасан сонголт хийсэн. Энэ итгэл хариуцлагыг хүлээж, сайн ажиллаарай” хэмээн хүсэн ерөөлөө.
