Сьерра Леонд үүргээ амжилттай биелүүлсэн энхийг сахиулагчдыг шагналаа
Монгол Улсын Ерөнхийлөгчийн зарлигаар Сьерра Леон улс дахь НҮБ-ын Энхийг сахиулах ажиллагаанд үүргээ амжилттай гүйцэтгэсэн зарим офицер, ахлагч нарыг төрийн медалиар шагнасан билээ. Уг шагналыг Ерөнхийлөгчийн Тамгын газрын дарга Д.Баттулга тэдгээр офицер, ахлагч нарт өнөөдөр гардуулж, баяр хүргэн үг хэлэв.
Ерөнхийлөгчийн Тамгын газрын дарга Д.Баттулга үгийнхээ эхэнд өнөөдөр Монгол Улсын Зэвсэгт хүчин хуулиар хүлээсэн үндсэн чиг үүргийнхээ зэрэгцээ НҮБ-ын энхийг дэмжих болон олон улсын бусад ажиллагаа, эх орныхоо хөгжил цэцэглэлт, бүтээн байгуулалтад оролцох, байгалийн гамшиг, үйлдвэрлэлийн ослоос хүн ам, эд баялгийг авран хамгаалах, хүмүүнлэгийн үйл ажиллагаанд дэмжлэг үзүүлэх зэрэг олон талт үүргийг амжилттай гүйцэтгэсээр байгааг дурдлаа. Тэрээр цааш нь хэлэхдээ даян дэлхийд энх тайвныг сахин хамгаалах, улс түмний сайн сайхан амьдралын төлөөх үйлсэд өөрсдийн хувь нэмрээ оруулж, энхийг дэмжих үүргээ амжилттай гүйцэтгээд ирсэн ээлжит цэргийн бие бүрэлдэхүүндээ хүндэтгэл үзүүлж байгаагаа тэмдэглэв.
Цэргийн хүндэт медалиар ЗХЖШ-ын даргын шадар туслах, дэд хурандаа Ж.Молорболд, Зэвсэгт хүчний 084 дүгээр ангийн холбооны дарга, хошууч Х.Алтанцоож нарын 5 хүнийг, Энхийн төлөө медалиар Зэвсэгт хүчний 027 дугаар ангийн төвийн орлогч дарга, хурандаа Г.Наранхүү, Зэвсэгт хүчний гадаад хэлний сургалтын төвийн дарга, хошууч Ч.Нямсүрэн, Зэвсэгт хүчний 167 ангийн оператор, ахлагч дэслэгч А.Төгс-Эрдэнэ, 189 дүгээр ангийн программчин, дэслэгч Э.Энх-Эрдэнэ, 327 дугаар ангийн станцын дарга-жолооч, ахлах ахлагч Ж.Мөрөнтулга, 027 дугаар ангийн сувилагч Б.Бурмаа, Хилийн цэргийн 0146 дугаар ангийн заставын орлогч, дэслэгч О.Цэнгэл нарын 125 хүнийг тус тус шагнасан юм.
Шагнагдагсдыг төлөөлж Зэвсэгт хүчний 186 дугаар ангийн нярав-засварчин, ахлах ахлагч Х.Түвшинжаргал хэлэхдээ, “Монгол Улсын Зэвсэгт хүчний 9 дүгээр ээлжийн цэргийн багийн бие бүрэлдэхүүн бид Сьерра Леон улсад Тусгай шүүхийн аюулгүй байдлыг хамгаалах үүргийг 6 сарын хугацаанд нэр төртэй гүйцэтгэж, эх орон, ард түмнийхээ хүлээлгэсэн хариуцлагатай үүргийг биелүүлж чадсандаа сэтгэл өндөр байна. Энэхүү баярт мөчид Монгол Улсын Ерөнхийлөгчийн Зарлигаар төрийн медаль хүртэж буйдаа бид баяртай байгаагаа уламжлая” гэв.
Сьерра Леонд үүргээ амжилттай биелүүлсэн энхийг сахиулагчдыг шагналаа
