Монгол Улсын Ерөнхийлөгчийн мэндчилгээ МУИС ХуульЗүйн Сургуулийн 50 жилийн ойд
МОНГОЛ УЛСЫН ЕРӨНХИЙЛӨГЧИЙН МЭНДЧИЛГЭЭ
Монгол Улсын Их Сургуулийн ХуульЗүйн Сургуулийн 50 жилийн ойд
Монгол Улсын Их Сургуульд дээд боловсролтой хуульчид бэлтгэж эхэлсний 50 жилийн ойг тохиолдуулан Та бүхэнд баярын мэндчилгээ дэвшүүлье.
Эх орондоо дээд боловсролтой хуульчдыг бэлтгэж эхэлсэн нь хуулийн байгууллагуудыг мэргэжлийн боловсон хүчнээр хангах, хууль ёсыг бэхжүүлэх, хууль зүйн шинжлэх ухааныг их сургуулийн төвшинд хөгжүүлэхэд нэн чухал алхам болсон юм. Өнгөрсөн 50 жилд МУИС-ийн Хууль зүйн сургууль өргөжин бэхжиж, эрх зүйн дээд боловсрол, хууль зүйн шинжлэх ухааны тэргүүлэх төв болжээ.
Монгол Улсад хүний эрх, эрх чөлөө, эрхзүйт төр ёс, ардчиллын үнэт зүйлийг хамгаалан хөгжүүлэхэд өргөн мэдлэгтэй, өндөр ур чадвартай, ариун ёсзүйтэй хуульчдын үүрэг асар их юм.
Монгол Улсад хууль зүйн дээд боловсролыг олон улсын жишигт хүргэж, мэргэжилдээ үнэнч, өндөр ур чадвартай хуульчдыг бэлтгэхэд хууль зүйн их дээд сургуулиудын эрдэмтэн багш нарын эрдэм мэдлэг нь гүнзгий, сургах арга зүй нь ур ухаантай, шавь нартаа өндөр шаардлага тавьдаг байх нь нэн чухал байна.
Эрхзүйн шинжлэх ухааны суурь болон хавсарга судалгааг хүний эрх, эрх чөлөөг хамгаалах, үндсэн хуульт ёсыг бэхжүүлэхэд чиглүүлж, улстөрийн харилцаанд эрхзүйн шинжлэх ухааны үзүүлэх нөлөөллийг хүчтэй болгох шаардлага тулгарч байна.
Монгол Улсад дээд боловсролтой хуульчдыг бэлтгэж ирсэн 50 жилийнхээ туршлага, сургамждаа тулгуурлан даяаршиж буй нээлттэй нийгмийн шинэ үеийн хуульчдыг бэлтгэх үйлсдээ улам их амжилт гаргахыг Та бүхнээс хүсч байна.
Монгол Улсын Ерөнхийлөгч Цахиагийн Элбэгдорж
Улаанбаатар хот. 2010 оны 9 дүгээр сарын 17-ны өдөр
Монгол Улсын Ерөнхийлөгчийн мэндчилгээ МУИС ХуульЗүйн Сургуулийн 50 жилийн ойд
