Ерөнхийлөгч орон нутагт ажиллаж, фермийн аж ахуй эрхлэгч, хүнсний ногоочидтой уулзав
Өндөр технологи хөрөнгө оруулалтаа хоёр жилд нөхдөг
Монгол Улсын Ерөнхийлөгч Ц.Элбэгдорж нийслэлийн Сонгино хайрхан дүүрэг, Төв аймгийн Батсүмбэр, Баянчандмань суманд 9 дүгээр сарын 16-нд ажиллаж, хот орчмын сүүний чиглэлийн фермерийн болон жимс, хүнсний ногооны аж ахуйн нэгж, иргэдийн төлөөлөгчидтэй уулзаж санал хүсэлтийг нь сонсов.
Ерөнхийлөгч Ц.Элбэгдорж эхлээд Батсүмбэр сумын Үдлэгт хэмээх газар очиж, жимс, хүнсний ногооны аж ахуй эрхэлдэг “Поливит” ХХК-ийн чацарганы тариалалтын ажилтай танилцсан юм.
“Монгол орны цаг уурт тохирсон, дэлхийд гайхагдах чанартай, үр өгөөж сайтай жимс бол чацаргана юм..Элс хайрга байсан энэ хөрсөнд чацаргана тарьсны дараа өвс ногоо халиурч ургах болсон. Хамгийн байгалд ээлтэй тариалан бол чацаргана юм” гэж Монгол Улсын гавъяат механикжуулагч Б.Балган, Монгол Улсын гавъяат агрономич Б.Лааган нар ярилаа. Чацарганы мод газрын хөрсийг азотоор баяжуулдаг тул өвс ногоо багсайн ургаж, жимснээс гадна их хадлан авах боломж бүрддэг байна. Үнэхээр ч чацаргана тариалсан хөрс сэргэж, цөлжилт багасдаг болохыг олонтоо харсан гэж Ерөнхийлөгч хэллээ.
“Поливит” ХХК энэ жил 40 га-гаас 100-120 тонн цацаргана хураах төлөвлөгөөтэй ажиллаж байна. Нэг модноос 18-24 кг жимс хурааж байна.. Энд том том хувин барсан хүмүүс жимсээ хурааж байв. Урт урт өргөстэй, хураахад бэрх жимс. Гэхдээ тэд цагт 16 кг жимсийг хураадаг ажээ. Бараг 100-аад ажлын байр бий болгосон тухайгаа тус компанийн захирал С.Пүрэв танилцууллаа. “ Бид ухах биш ургуулж байх хөгжинө гэж боддог” гэж тэрээр хэлсэн юм.
Эгнүүлэн барьсан хүлэмжийн жигдхэн ургасан үрсэлгээг үзүүллээ. 8 хүлэмжтэй аж. Нэг хүлэмжинд л гэхэд олон мянган бяцхан мод ярайна. Бас чацарганаар хийсэн бүтээгдэхүүнүүд үзүүллээ. Франц, Голланд шиг барууны өндөр технологиор боловсруулбал үнээ 10 дахин нэмэгдүүлэх, хөрөнгө оруулалтаа хоёрхон жилд нөхөх, чацаргана тарьдаг гол орон болох боломж байгааг Ерөнхийлөгч дурдан анхаарууллаа.
“Хаа ч тарихад ургадаг, хөрс голдоггүй жимс бол үнэхээр чацаргана юм. Би говьд чацаргана тарьдаг нэг хүнтэй уулзаж байсан.Тэр хүн 200 ямаа хариулснаас 200 чацарганы мод тарьсан нь илүү үр ашигтай байна гэж ярьж байсан. 10 мянган га-д чацаргана тарихад өнөөдрийн Эрдэнэтийн орлоготой дүйхүүц ашиг олох тооцоо бий. Үүнийг хүмүүст ойлгуулах хэрэгтэй. Энэ чиглэлээр ажиллаж байгаа хүмүүсийг Засгийн газар дэмжих ёстой. Маш олон орон чацарганыг сонирхож байна. Энэ бол Монголын нүүр царайг аваад явах аж ахуй. Байгалийг хүртэл яаж сайхан өөрчилж буйг бид харж байна. Бүх аймаг, сум чацаргана тарих хэрэгтэй” гэж Ерөнхийлөгч хэлэв.
Засгийн газрын “Чацаргана” хөтөлбөр амжилттай хэрэгжиж, энэ чиглэлийн бизнес хийж байгаа аж ахуйн нэгжүүдийг дэмжиж байгаа гэж Засгийн газрын гишүүн, ХХААХҮ-ийн сайд Т.Бадамжунай хэлсэн.
Ерөнхийлөгч Засгийн Газраас зарласан “Чацаргана” хөтөлбөрт амжилттай оролцож байгаа “Поливит” ХХК-ийн хамт олонд 5 хүлэмжийн тоног төхөөрөмж өгөх батламж гардуулав.
Ерөнхийлөгч орон нутагт ажиллаж, фермийн аж ахуй эрхлэгч, хүнсний ногоочидтой уулзав
