Монгол Улсын Ерөнхийлөгч Ц.Элбэгдорж өнөөдөр “Мон Уран” компанийн захирал Б.Наранхүүгийн уяагаар зочиллоо.
Энэ жилийн наадмаар зургаа дахь удаагаа түрүүлж, торгон жолоогоо өргүүлсэн , домогт бага шарга азарга уяан дээрээ дүүхэлзэн угтсан юм.
Домогт ах дүү хоёр азарганы дүү, шарга азарга барианд орох торгон мөчид наадамчин олны сэтгэл догдолж, нүдэндээ нулимстай гийнгоолж байсан билээ.
“Тогоруу халтарын төл, Галшарын удам болсон шарга азарга аргагүй хурдан хүлэг гэдгээ харууллаа. Энэ жилийн наадмын олон сайхан чимэгүүдийн нэг нь шарга азарга яахын аргагүй мөн.
Монгол зоныхоо сэтгэлийг тэнийлгэсэн, дараа жилийн наадам хүртэл ярих юм ихтэй сайхан наадам боллоо.
Хурдан шаргын амжилт дараа дараагийн наадамд ч давтагдах болтугай” гэж Ерөнхийлөгч уяачдад ерөөлөө.
“Хоёр шарга азарга миний амьдралын салшгүй хэсэг. Бага шарга азаргад монгол түмэн хайртай байдаг.
Энэ сайхан хурдан хүлгийн уяа сойлгыг тааруулж, олон жил наадамчин олноо баясгах их хувь зохиол надад таарсанд би баярладаг” гэж уяач Э.Эрдэнэчулуун Ерөнхийлөгчтэй хөөрөлдөхдөө хэлсэн юм.
Уяагаар нь зочилсон Ерөнхийлөгч Ц.Элбэгдоржид Б.Наранхүү “ Ард түмнийхээ өмнө хүлээсэн төрийн их ажлаа манай шарга азарга шиг хурдан хиймортой хийгээрэй” гэж ерөөлөө.
