Махны импортод ОХУ хориг тавьсантай холбогдуулан Ерөнхийлөгчид хандав
Монгол Улсын Ерөнхийлөгчийн Тамгын газрын дарга Д.Баттулга, Ерөнхийлөгчийн хот, хөдөөгийн хөгжлийн асуудал хариуцсан зөвлөх Л.Эрхэмбаяр нар Монголын махны холбооны гүйцэтгэх захирал М.Лхачинбал тэргүүтэй махны үйлдвэрлэл эрхлэгчдийн төлөөлөгчидтэй өнөөдөр төрийн ордонд уулзлаа.
-Монголын зүүн бүсэд малын шүлхий өвчин гарсантай холбогдуулан ОХУ энэ 9 дүгээр сарын 13-нд манайхаас авдаг үхрийн махны импортдоо түр хориг тавьчихлаа. Адууны махыг авна гэсэн. Мах бэлтгэдэг компаниуд 500-1000 тонн мах хадгалах жижиг зоорьтой. Мах нядлах ажил зогсохоор болчихоод байна. Нөгөөтэйгүүр яг өдийд мах экспортлон мөнгө эргэлтэд орж, 11 дүгээр сар хүртэл мал худалдан авах, нядлах ажил үргэлжилдэг юм. Энэ ажил саарч, үйлдвэрлэгчдийн авсан банкны зээлийн эргэн төлөлт хүндэрч магадгүй байдалтай боллоо. Засгийн газрын шийдвэрийн дагуу ирэх оны хэрэгцээнд зориулан махны үйлдвэрүүд Улаанбаатарт 12000 тн, Дархан, Эрдэнэтэд тус бүр 1000 тн мах бэлдэж нөөцлөхөөр гэрээ байгуулан үүрэг хүлээсэн байгаа. Үүнийг хэрэгжүүлэхэд ч хүндрэл үүсэхээр байна.
Өвчин гараагүй төвийн болон баруун бүсийн мах бэлддэг компаниудын бүтээгдэхүүнд хоригоо цуцалж өгөөч гэсэн хүсэлт ОХУ-д тавих бодолтой байгаа. Зүүн бүсэд гарсан шүлхийн вакцины хөрөнгө мөнгө гаргах асуудлыг шуурхай шийдээгүйгээс ийм байдалд хүргэлээ. Байдлыг Монгол Улсын Ерөнхийлөгчид уламжилж, холбогдох арга хэмжээ авахуулан бидний ажилд дэмжлэг үзүүлнэ үү хэмээн Махны холбооны гүйцэтгэх захирал М.Лхачинбал мэдэгдэв.
Ерөнхийлөгчийн Тамгын газрын дарга Д.Баттулга тэдний хэлсэн зүйлийг уламжлахаа мэдэгдээд, аль 5 дугаар сард гарсан өвчнийг шуурхай арга хэмжээ авалгүй хариуцлагагүй хандаж ийм байдалд хүргэсэнтэй холбогдуулан Ерөнхийлөгч бүрэн эрхийнхээ хүрээнд зохих анхаарал тавина гэдэгт итгэж байгаагаа илэрхийллээ.
Махны импортод ОХУ хориг тавьсантай холбогдуулан Ерөнхийлөгчид хандав
