Монгол Улсын Ерөнхийлөгчийн ахлах зөвлөх П.Цагаан Рио тинто болон Монгол Улсын их сургуулийн төлөөлөлтэй уулзаж, Оюу толгой ХХК, МУИС болон Рио тинто группийн хамтран хийж буй “Монголын эдийн засагт Оюу толгойн үзүүлэх нөлөө” судалгааны урьдчилсан дүнтэй танилцлаа.
Судалгаа нь монголын эдийн засагт Оюу толгойн үзүүлэх шууд ба шууд бус нөлөөг харуулах бөгөөд дотоодын нийт бүтээгдэхүүнд уг төслийн эзлэх хувь, төсвийн орлогод оруулах хэмжээ болон иргэдийн орлогод нөлөөлөх бодит хэмжээ гэсэн үндсэн үзүүлэлтүүдийг тооцож гаргахыг чухалчилж байгаа юм.
Уулзалтын үеэр ахлах зөвлөх П.Цагаан хэлэхдээ “Хэдийгээр энэхүү судалгааг хийхэд багагүй цаг хугацаа, хөрөнгө хүч, эдийн засгийн нарийвчилсан тооцоо шаардсаныг ойлгож, судалгааны багийнханд талархаж байгаа ч, Оюу толгойн орлогын тооцоолол, түүний бүтэц, бүрэлдэхүүний хувь, хэмжээг бодит байдалтай дүйцүүлсэн судалгаа гаргах нь та бүхний хийж буй ажлын хамгийн хүндрэлтэй бөгөөд чухал хэсэг юм. Тиймээс монголын эдийн засаг, ард түмэнд Оюу толгой төслийн өгөх үр өгөөжийг бодитой харуулахад анхаарлаа хандуулах нь зүйтэй” гэдгийг онцлон тэмдэглэлээ.
