Монгол Улсын Ерөнхийлөгчийн илгээлт Компаний захирлуудын дээд хэмжээний “CEO Summit-2010” чуулга уулзалтад оролцогчдод
Компаний захирлуудын дээд хэмжээний “CEO Summit-2010” чуулга уулзалтад оролцогчдод
Монгол улсын эдийн засаг, бизнесийн хөгжилд томоохон үүрэг гүйцэтгэж жинтэй хувь нэмэр оруулж байгаа манай ТОП аж ахуйн нэгжүүдийн удирдлага, улс орны хөгжлийн хөдөлгөгч хүч болсон хувийн хэвшлийн төлөөлөл Та бүхэнд болон монгол улсад анх удаагаа зохион байгуулагдаж байгаа тус чуулга уулзалтын үйл ажиллагаанд амжилт хүсч мэндчилье.
Эзэн Чингисээс улбаатай монгол төрийн удирдлага, менежмент нь эрдэм мэдлэг, өндөр чадвар туршлага бүхий олон авьяаслаг удирдагч буюу өнөөгийн хэлээр менежер, CEO нарын хичээл зүтгэл, идэвхи чармайлт, санал санаачилагын үндсэн дээр амжилттэй хэрэгжиж ертөнцийн талыг удирдан захирч байсан өрлөг түүх бидэнд бий. Энэхүү өвийн үргэлжлэл, өнөөгийн улс орны хөгжлийн тэргүүлэгч хүч, түүчээ болж байгаа Та бүхэнд монголын төр гүнээ талархаж байдгийг уламжлахад таатай байна.
Аль ч улс оронд томоохон бизнесийнхэн, аж ахуйн нэгжүүд улс орны хөгжилд тэргүүлэх үүрэг гүйцэтгэж ачааны хүндийг үүрч явдаг тэр л жам ёсны дагуу Та бүхэн ч монгол улсын хөгжилд чухал үүрэг гүйцэтгэж өндөр үүрэг хариуцлага хүлээж байгаа. Айл гэр гэрийн эзнээс гэдэг шиг аж ахуйн нэгж, байгууллага ямар байх нь түүний удирдлага, менежментээс шууд хамаардаг. Энэ үүднээс олон хүний амьжиргааг авч яваа, ажлын байраар хангаж байгаа, улсын төсөв бүрдүүлэхэд том хувь нэмэр оруулж байгаа өнөөдрийн аж ахуйн нэгжийн удирдагч буюу CEO нарын үүрэг роль улам бүр өндөрсөж байна. Тухайлбал:
Даяаршлагдан нэгдэж байгаа өнөөгийн дэлхий ертөнцөд Компаний засаглалын нийтлэг зарчмууд, олон улсын арга туршлагаас бүтээлчээр суралцан өөрийн орон, компанийхаа нөхцөл байдалд нийцүүлэн амжилттай хэрэгжүүлэх, аж ахуйг эрхлэн хөтлөх арга ухаанаа улам өргөжүүлэн хөгжүүлэх шаардлага тулгарч байна.
Цаг уурын өөрчлөлт манай улсын хувьд хамгийн анхаарал татсан, тулгамдсан асуудал болоод байгааг харгалзан байгаль орчноо хамгаалах үйлсэд манай ТОП аж ахуйн нэгжүүд тэргүүлэн оролцох хэрэгтэй байна. Ашигт малтмалаар арвин манай орны хувьд байгалийн нөөц бололцоогоо зөв зохистой ашиглан
Компаний нийгмийн хариуцлагаа дээшлүүлэн нийгмийн тулгамдсан асуудлуудыг шийдэхэд компаниуд өргөн хүрээнд оролцох шаардлагатай байгаа ба энэ чиглэлээр манай аж ахуйн нэгж, компаниуд идэвхи, санаачилагатай хандаж байгаад Монгол улсын Ерөнхийлөгчийн хувьд талархан дэмжиж байна. НҮБ-ын Даян дэлхийн гэрээнд дэлхийн нэр хүнд бүхий томоохон компаниудтай хамт монголын томоохон 46 компани нэгдээд байгаа нь сайшаалтай.
Төр-хувийн хэвшлийн түншлэлийг өргөжүүлэн хөгжүүлэхэд Та бүхний идэвхитэй оролцоо, санал санаачлага чухал үүрэг гүйцэтгэнэ. Концессын тухай хууль, төр-хувийн хэвшлийн түншлэлийн талаар төрөөс баримтлах бодлого зэрэг үндсэн бичиг баримтууд батлагдан гарсан бөгөөд эдгээрийг үр дүнтэй, бүтээлчээр хэрэгжүүлэхэд манай томоохон аж ахуйн нэгжүүд идэвхитэй оролцож хамтран хэрэгжүүлэх шаардлагатай байна.
Улс орны хөгжлийн үндэс суурь болсон жижиг дунд бизнесийг хөгжүүлэхэд томоохон аж ахуйн нэгжүүдийн үүрэг, туслалцаа дэмжлэг чухал байдаг. Энэ үүднээс манай ТОП аж ахуйн нэгжүүд олон сайхан санал санаачилага гарган ажиллаж байгаад талархахын зэрэгцээ цаашид энэ үйл ажиллагаагаа улам эрчимжүүлж илүү өргөн хүрээнд, өргөн цар хүрээтэй ажиллана гэдэгт итгэлтэй байна.
Монгол улсын хувийн хэвшлийн өнгөрсөн 20 жилийн түүхэн хөгжил, ололт амжилт нь Та бүхний үйл ажиллагаатай салшгүй холбоотой. Та бидэнд алдсан ч, оносон ч зүйл их бий. Ирээдүйд дэлхий дахинд нэр алдраа цуурайтуулсан, монгол улсын хөгжилд чухал үүрэг гүйцэтгэх, монголын нэрийг дэлхийд гаргасан брэнд бүтээгдэхүүнүүдийг бий болгох гол хүч болох манай ТОП аж ахуйн нэгжүүдийн удирдлагууд Та бүхнээс монголын ирээдүй, хувь заяа шалтгаална. Энэ өндөр үүрэг хариуцлага, итгэл найдварыг Та бүхэн бүрэн дааж ажиллана гэдэгт Монгол улсын Ерөнхийлөгчийн хувьд миний бие бүрэн итгэлтэй байна.
Монгол улс мандан бадрах болтугай.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
Улаанбаатар хот
2010.09.27.
Монгол Улсын Ерөнхийлөгчийн илгээлт Компаний захирлуудын дээд хэмжээний “CEO Summit-2010” чуулга уулзалтад оролцогчдод
