Монгол Улсын Ерөнхийлөгч Бүгд Найрамдах Финланд улс, Данийн вант улсад айлчилна
Монгол Улсын Ерөнхийлөгч Ц. Элбэгдорж 2010 оны 10 дугаар сарын 4-5-нд Брюссель хотноо АСЕМ-ийн дээд хэмжээний VIII уулзалтад оролцсоны дараа 10 дугаар сарын 5-7-нд Бүгд Найрамдах Финланд Улсад, мөн сарын 7-9-нд Данийн Вант Улсад албан ёсны айлчлал хийнэ.
Монгол Улсын Ерөнхийлөгч Бүгд Найрамдах Финланд Улсын Ерөнхийлөгч хатагтай Т.Халоненийн урилгаар 10 дугаар сарын 5-7-нд Бүгд Найрамдах Финланд Улсад айлчлахдаа Финланд Улсын Ерөнхийлөгч хатагтай Т.Халонентай ганцаарчилсан уулзалт хийхээс гадна тус улсын Парламентын дарга ноён Саули Нийнисто, Ерөнхий сайд хатагтай Мари Кивиниеми, Гадаад хэргийн сайд ноён Александр Стубб, Хөдөө аж ахуй, ойн сайд хатагтай Сиркка-Лииса Анттила нартай уулзана.
Монгол Улсын Ерөнхийлөгч Финланд Улсад хийж буй айлчлалынхаа үеэр Финландын Зэвсэгт хүчний Туусула дахь олон улсын сургалтын төвд зочилж, хөдөлгөөнт холбоо, гар утасны үйлдвэрлэлээр дэлхийд томхонд тооцогддог Нокиа корпораци, уул уурхайн техник технологи үйлдвэрлэгч Оутотек компанийн үйл ажиллагаатай танилцана.
Монгол Улсын Ерөнхийлөгч Ц. Элбэгдорж Данийн Цог жавхлант Хатан хаан II Маргретийн урилгаар 10 дугаар сарын 7–9–нд Данийн Вант Улсад албан ёсны айлчлал хийхдээ Данийн Цог жавхлант Хатан хаан II Маргрете, Парламентын дарга ноён Тор Педерсэн, Ерөнхий сайд ноён Ларс Локке Расмуссен нартай уулзана.
Монгол Улсын Ерөнхийлөгч Данийн Вант Улсад хийх албан ёсны айлчлалынхаа үеэр эрчим хүчний олон төрлийн эх үүсвэрээр ажилладаг “Авердор-2” цахилгаан станц, сүү, сүүн бүтээгдэхүүн үйлдвэрлэгч “АРЛА”аж ахуйн үйл ажиллагаатай танилцана.
Монгол Улсын төрийн тэргүүн Бүгд Найрамдах Финланд Улс, Данийн Вант Улсад айлчлахдаа Монгол болон Финланд, Данийн бизнес эрхлэгчдийн чуулга уулзалтуудад оролцож үг хэлнэ.
Монгол Улсын Ерөнхийлөгчийг албан ёсны төлөөлөгчдөөс гадна бизнесийн төлөөлөгчид дагалдах болно.
эх сурвалж гадаад харилцааны яам www.mfat.gov.mn
Монгол Улсын Ерөнхийлөгч Бүгд Найрамдах Финланд улс, Данийн вант улсад айлчилна
