“Инноваци ба технологийн бодлого, хөгжлийн чиг хандлага” олон улсын бага хурал боллоо
Монгол Улсын Ерөнхийлөгчийн дэргэдэх Иргэний танхимд “Инноваци ба технологийн бодлого, хөгжлийн чиг хандлага” олон улсын бага хурал өнөөдөр болж Боловсрол, соёл, шинжлэх ухааны дэд сайд Ч.Куланда нээж үг хэллээ.
Монгол Улсын Ерөнхийлөгчийн Тамгын газар энэхүү олон улсын бага хурлын ерөнхий зохион байгуулагч бөгөөд уг арга хэмжээ нь Монгол Улсын Ерөнхийлөгчийн мөрийн хөтөлбөр, шинжлэх ухаан, технологийг 2007-2020 онд хөгжүүлэх мастер төлөвлөгөө зэрэг төр, засгийн бодлогын баримт бичгүүдийг цаг алдалгүй хэрэгжүүлэхэд ач холбогдолтой хэмээн үзэж байгаа юм.
Монгол Улсын тогтвортой хөгжлийн нэн чухал хүчин зүйл шинжлэх ухаан, технологи, инноваци, бизнес, санхүүгийн салбарын үйл ажиллагааны уялдаа холбоог сайтар хангах нь туйлын чухал болж байна. Инновацийг хөхиүлэн дэмжиж, эрдэм шинжилгээ, судалгааны ажлыг үйлдвэржүүлэлт, бизнес хөгжлийн үйлчилгээ, инкубаци, санхүүжилтийн шинэ арга хэрэгсэл, механизмтай холбож өгөх нь эдийн засгийн эргэлтийг хурдасгаж, санхүүгийн салбарт ч үсрэнгүй ахиц гарах өндөр магадлалтай билээ. Монгол Улс дэлхийн шилдэг, хамгийн үр ашигтай технологийг өөрийн оронд оруулахын зэрэгцээ улс орнуудын технологийн талаар мэдээлэл сайтай байж, өөрийнхийгөө бусдад түгээж, үнэлүүлэн арилжаанд оруулах нь ганц газрын доорхи баялгийн хүчинд дулдуйдах бус эдийн засгаа төрөлжүүлэн үр ашгийг нь нэмэгдүүлэх, бүтээмжийг өсгөх, өрсөлдөх чадвараа дээшлүүлэх замаар хөгжих боломж бололцоог нээж өгнө.
Иймээс бага хуралд төрийн байгууллага, хувийн хэвшил, шинжлэх ухааны салбарын хүмүүс идэвхтэй оролцов. Үндэсний хөгжил, шинэтгэлийн хорооны шинэтгэлийн бодлогын газрын хэлтсийн дарга Д.Арвинбаяр “Монгол Улсын инновацийн бодлого, хөгжлийн ерөнхий хандлага”, M-CAM компанийн удирдах зөвлөлийн дарга, Ерөнхий захирал доктор Давид Е Мартин “Даян дэлхийн инноваци, технологийн хөгжил, чиг хандлага”, Монгол Улсын Шинжлэх ухааны академийн тамгын газрын эрдэмтэн нарийн бичгийн дарга Т.Галбадрах “Шинжлэх ухаан, бизнесийн хамтын ажиллагаа”, M-CAM компанийн ерөнхийлөгч Давид Пратт “Инноваци, технологийг дэмжин хөгжсөн бусад улсын тэргүүн туршлага”, M-ICP компанийн удирдах зөвлөлийн дарга, Гүйцэтгэх захирал Д.Нэргүй “Инноваци, технологийн хөгжилд хувийн салбарын оролцоо” гэсэн сэдвүүдээр илтгэл тавьж, хүмүүсийн сонирхсон асуултад хариуллаа. Түүнчлэн бүтээлч санаачилгыг амьдралд хэрэгжүүлсэн туршлагаасаа Монгол бизнес инкубаторуудын үндэсний нэгдсэн холбоо, Төмөр машин үйлдвэрлэгчдийн холбоо, Архангай аймгийн хасуу группийн төлөөлөгчид танилцуулав.
Шинжлэх ухаан монголын эдийн засгийн салбар болж чадаагүй нь үйлдвэрлэлийн хөгжил, уламжлалт сэтгэлгээ, хөрөнгө оруулалт бараг байхгүйтэй адил зэрэг учир шалтгаантай холбоотой ажээ. Монголын шинжлэх ухааны салбарын санхүүжилт ДНБ-ий 0.2 хувьтай тэнцүү байгаа юм. Тэгвэл Израильд энэ үзүүлэлт 4.46, АНУ-д 2.54, Японд 3.15, Шведэд 3.74, Солонгост 2.64 хувь байдаг аж. Ийм нөхцөлд нэгэнт бий болсон бэлэн технологийг үйлдвэрлэлд нэвтрүүлэх, технологийн мэдээллийг хүртээмжтэй болгох, технологийн нэгдсэн бодлого боловсруулан баримтлах, шинжлэх ухаан-бизнесийг холбогч зуучлагчдийг төрүүлэх, энэ хоёр салбарын хамтын ажиллагааг хөгжүүлэх, дэлхийн бусад орны шинэ технолгийг авч ашиглах арга замыг бизнес эрхлэгчдэд ойлгуулах, уламжлалт сэтгэлгээг өөрчлөх, өөрийн орны инженер, эрдэмтэд, ажил хэрэгч, бизнес эрхлэгч хүмүүсийн үүсгэл санаачилгыг хөрөнгө оруулалтаар дэмжих шаардлагатай байгааг оролцогчид чухалчлан ярилаа.
“Инноваци ба технологийн бодлого, хөгжлийн чиг хандлага” олон улсын бага хурал боллоо
