Эрүүл мэндийн салбарт ажилласан хөдөлмөрийг нь төр үнэлэв
Монгол Улсын Ерөнхийлөгч Ц.Элбэгдорж өнөөгийн Монгол орон даяар бий болсон эрүүл мэндийн өргөн тогтолцооны гал голомт, эрүүл мэндийн асуудал эрхэлсэн төрийн захиргааны төв байгууллага-Эрүүл мэндийн яам байгуулагдсаны 80 жилийн ойг тохиолдуулан үе үеийн хамт олон, эмч мэргэжилтнүүдэд чин сэтгэлийн мэндчилгээ дэвшүүлснийг Ерөнхийлөгчийн зөвлөх Р.Болд Дуурь бүжгийн эрдмийн театрт ойн баярын хуралдаа цугларсан тус салбарын төлөөлөгчдөд уншин сонсгов.
Ерөнхийлөгч мэндчилгээндээ “Эрүүл мэндийн салбарт хууль эрх зүйн орчинг бүрдүүлж, эдийн засаг, санхүү, удирдлага зохион байгуулалтын хувьд бэхжүүлэх, эрүүл мэндийн тусламж, үйлчилгээ, урьдчилан сэргийлэх ажлын чанарыг олон улсын стандартын түвшинд ойртуулах, эрүүл мэндийн байгууллагуудыг орчин үеийн оношлогооны техник, тоног төхөөрөмж, мэргэжлийн өндөр түвшинд бэлтгэгдсэн эмч, эмнэлгийн мэргэжилтнээр хангах, дэлхийн улс орнууд, олон улсын байгууллагуудтай нягт хамтран ажиллах бодлогыг амжилттай хэрэгжүүлж, үндэсний хэмжээнд эрүүл мэндийн өргөн сүлжээг бий болгож чадсан нь Эрүүл мэндийн яамны үе үеийн удирдлага, эмч, мэргэжилтнүүдийн уйгагүй хөдөлмөр зүтгэлийн үр дүн гэдгийг бахархан тэмдэглэж байна.
Даяаршиж буй дэлхий ертөнцөд анагаахын шинжлэх ухааны шинэ ололтууд хурдацтай түгэн дэлгэрч буй энэ цаг дор улс үндэстнийхээ эрүүл мэндийн хэрэгцээг дэлхийн түрлэгтэй чадварлаг хослуулж, олон улсын эрдэм шинжилгээний хамтарсан судалгааны орчилд идэвхтэй байр суурь эзэлж, анагаах эрдмийн шинэ, шилдэг арга ухаанаас байнга суралцаж, дэлхийн эрүүл мэндийн байгууллагатай нягт хамтран ажиллаж, хөдөөгийн хүн амд үзүүлэх эрүүл мэндийн тусламж, үйлчилгээний чанар, үр өгөөжийг улам бүр сайжруулж ажиллана гэдэгт Монгол Улсын Төрийн тэргүүн би итгэлтэй байна” гэж тэмлэглэжээ.
Эрүүл мэндийн яамны 80 жилийн ой болж байгаатай холбогдуулан тус салбарт олон жил үр бүтээлтэй ажиллаж буй зарим хүнийг Монгол Улсын Ерөнхийлөгч зарлиг гарган төрийн одон, медалиар шагнасныг дараа нь гардуулав.
Эрүүл мэндийн яамны ахлах мэргэжилтэн Д.Амар, мэргэжилтэн И.Даваадорж, Эмнэлгийн тусламжийн бодлогын хэрэгжилтийг зохицуулах газрын дарга Ш.Энхбат нарт Хөдөлмөрийн гавьяаны улаан тугийн одон, Гэмтэл согог судлалын үндэсний төвийн тархи, нуруу, нугасны клиникийн эрхлэгч Ж.Оюунтөгс нарын 3 хүнд “Алтан гадас” одон, ЭМЯ-ны хэлтсийн дарга Ч.Мөнхдэлгэр нарын 2 хүнд хөдөлмөрийн хүндэт медаль Ерөнхийлөгчийн Тамгын газрын дарга Д.Баттулга гардуулж, хүн ардын эрүүл мэндийн төлөө өдөр шөнөгүй ажилладаг хүмүүсээ төр үнэлж байна гэж хэллээ.
Эрүүл мэндийн салбарт ажилласан хөдөлмөрийг нь төр үнэлэв
