Нийслэлийн дүүргүүдийн Иргэний оролцооны хэлтэс, албадын ажилтнуудын туршлага солилцох уулзалтыг "Иргэдийн оролцоог идэвхжүүлэн чиглүүлэх" гэсэн сэдвийн дор зохион байгууллаа.
Энэ удаагийн уулзалтыг Сүхбаатар дүүргийн ИТХ-ын Ажлын албаны Иргэний оролцооны хэлтэс зохион байгуулж туршлага солилцох уулзалт, хэлэлцүүлгийг дүүргийн ИТХ-ын дарга Б.Ган-Эрдэнэ нээж үг хэлсэн юм. Тэрээр санал санаачилгыг хүлээн авч, хүрэлцэн ирсэн хүмүүст талархаж байгаагаа илэрхийлээд дүүргийн ИТХ-аас гаргаж буй тогтоол, шийдвэр, дүүргийн хэмжээнд хийгдэж буй бүтээн байгуулалтын ажлуудад иргэдийн санал бодлыг хэрхэн тусгаж хэрэгжүүлж ажиллаж байгаагаа танилцуулав.
Мөн уулзалтын үеэр Монгол Улсын Ерөнхийлөгчийн Иргэний оролцоо, эдийн засгийн бодлогын зөвлөх Л.Дашдорж Иргэний оролцооны туршлага, Монголын Нутгийн удирдлагын нийгэмлэгийн гүйцэтгэх захирал Ц.Батгэрэл "Нутгийн удирдлагын байгууллагуудын үйл ажиллагаанд иргэдийн оролцоог олон нийтийн цахим сүлжээнд тулгуурлан өргөтгөх нь" сэдвээр илтгэл тавилаа. Сүхбаатар дүүргийн Иргэний оролцооны хэлтсийн Иргэний танхимын албаны ахлах ажилтан М.Эрдэнэчимэг Иргэний дуу хоолой ба түүний үр нөлөө буюу “CVA аргачлалаар шийдвэр гаргах түвшинд иргэдийн оролцоог хангах нь" сэдвээр нээлттэй хэлэлцүүлэг зохион байгуулсан юм. Сүхбаатар дүүргийн ИТХ-ын Иргэний оролцооны хэлтэс нь Иргэний дуу хоолой ба түүний үр нөлөө /CVA/ аргачлалаар дүүргийнхээ хэд хэдэн хороодын иргэдийн дунд хэлэлцүүлэг зохион байгуулж үр дүнд хүрч байсан юм.
Уулзалтын төгсгөлд дүүргүүдийн Иргэний оролцооны хэлтсүүд чөлөөт ярилцлага өрнүүлж, цаашид хэрхэн хамтарч ажиллах, 2015 оны зорилго зорилтууддаа юуг тусгах талаар санал хэлэлцлээ.
