АСЕМ-ын Дээд хэмжээний уулзалт өнөөдөр эхэлж байна
“Бүх нийтэд илүү сайн сайхан, сэтгэл өег, улам хангалуун амьдрах нөхцөлийг бүрдүүлэх нь” сэдвийн дор Ази-Европ (АСЕМ)-ын Дээд хэмжээний наймдугаар уулзалт болох гэж байна.
Бельгийн Вант Улсын нийслэл Брюссель хотноо эрх тэгш түншлэл, харилцан итгэлцэл, харилцан үр ашигт суурилсан Ази, Европын хамтын ажиллагааг эрчимжүүлэх зорилгоор дэлхийн 48 орны mөр, засгийн тэргүүнүүд уулзах гэж байна. Европын комиссийн тэргүүн Хосе Мануэл Бароссо, Европын Зөвлөлийн Ерөнхийлөгч Херман Ван Румпуи, ХБНГУ-ын Канцлер Ангела Меркель, Франц Улсын Ерөнхийлөгч Никола Саркози, БНСУ-ын Ерөнхийлөгч Ли Мён Бак, Болгар Улсын Ерөнхийлөгч Г.С.Парванов, БНЧУ-ын Ерөнхийлөгч Вацлав Клаус , Латви Улсын Ерөнхийлөгч Валдис Затлерс, БНЭУ-ын Дэд Ерөнхийлөгч Хамид Ансари, БНХАУ-ын Төрийн зөвлөлийн дарга Вэн Зябао, Япон Улсын Ерөнхий сайд Наото Кан нар хэдийнэ иржээ.
Тэд олон улсын хамтын ажиллагааны өргөн хүрээтэй асуудлуудыг хөндөж, “Эдийн засаг, санхүүгийн засагдал”, “Тогтвортой хөгжил”, “Дэлхийн өмнө тулгамдсан асуудал”, “Иргэд хоорондын харилцаа” сэдвээр болох салбар хуралдаануудад оролцон, үг хэлж саналаа илэрхийлэх юм.
Монгол Улсын Ерөнхийлөгч Ц.Элбэгдорж, Дээд хэмжээний наймдугаар уулзалтын үеэр дээрх 4 салбар хуралдаанд оролцож, “Тогтвортой хөгжил” салбар хуралдаанд үг хэлэх болно. Ялангуяа байгаль орчны асуудалд дэлхийн удирдагчдын анхаарлыг хандуулна.
Дээд хэмжээний уулзалтаас “АСЕМ-ын Дээд хэмжээний уулзалтын даргын мэдэгдэл”, “Эдийн засаг, санхүүгийн илүү үр дүнтэй засаглалын төлөө Тунхаглал” зэрэг бичгийг батлахаар төлөвлөж байна.
Түүнчлэн Дээд хэмжээний уулзалтаар АСЕМ-ын гишүүнээр элсэх тухай Австрали, ОХУ, Шинэ Зеланд улсуудын хүсэлтийг хэлэлцэж, албан ёсоор баталгаажуулна.
This text will be replaced
АСЕМ-ын Дээд хэмжээний уулзалт өнөөдөр эхэлж байна
