Х.В.Ромпуй: Харилцан итгэлцэл бол хамтын ажиллагааны үндэс суурь юм
Бельгийн Вант Улсын нийслэл Брюссель хотноо Ази, Европын Дээд хэмжээний наймдугаар уулзалт эхэллээ.
Брюссель дэх хааны ордонд Дээд хэмжээний уулзалтад оролцохоор ирсэнтөр, засгийн тэргүүнүүдийг, Бельгийн Цог Жавхлант Ван Хоёрдугаар Альберт, Европын Зөвлөлийн Ерөнхийлөгч Херман Ван Ромпуй, Бельгийн Ерөнхий сайд Ив Латерм, Европын комиссын дарга Хосе Мануэль Бароссо нар угтан авав.
Дээд хэмжээний уулзалтыг нээж ноён Х.В.Ромпуй хэлэхдээ “Дэлхийн хүн амын 58%, худалдааны 60 %-ийг хамарсан бүс нутгийг төлөөлсөн лидерүүд та бүхэн илүү энх тайван амар амгалан, тогтвортой, хангалуун амьдралыг хэрхэн хүмүүст өгөх вэ гэдэг амаргүй хариуцлагыг үүрсэн билээ. Ази, тогтвортой хүчтэй эдийн засгийнхаа нөлөөгөөр дэлхийн тавцанд голлох байр суурийг эзлэх боллоо. Харин Европын хувьд зүүн, баруун хэмээн хуваагддаг байсан нь түүх болон үлдлээ. Бидэнд хариуцлагаа хэрэгжүүлэх боломж улам нэмэгдсээр байна. Өнөөдөр бид дараах зүйл дээр тогтож ярилцах гэж байна. Эдгээр нь дэлхийн эдийн засаг- санхүүгийн засаглал, илүү тогтвортой удаан үргэлжлэх хөгжил,бүс нутаг болон олон улсын хамтын ажиллагаа, аюулгүй байдал хүмүүнлэгийн тусламжийн хүрээнд хамтран ажиллах зэрэг болно. Харилцан итгэлцэл бол хамтын ажиллагааны хамгийн гол үндэс суурь билээ” гэсэн юм.
Мөн БНХАУ-ын Төрийн зөвлөлийн дарга Вэн Зябао, БНСУ-ын Ерөнхийлөгч Ли Мён Бак, Бельгийн Ерөнхий Сайд Ив Латерм нар төр, засгийн тэргүүнүүдэд хандлаа.
Эдийн засгийн хөгжил, нийгмийн эв санааны нэгдэл, хүрээлэн буй орчныг хамгаалах зэрэг нь харилцан уялдаатай бөгөөд тогтвортой хөгжлийг хангах үндсэн гурван тулгуур юм гэдгийг уриалах, санхүүгийн салбарт шинэчлэл хийх, өрсөлдөх чадварыг бэхжүүлэх олон улсын санхүүгийн шинэ тогтолцоог бий болгох чиглэлээр хамтын ажиллагаагаа баяжуулахаа нотлох, терроризмтэй тэмцэх, хүний эрх аюулгүй байдлыг хангах, гамшгаас урьдчилан сэргийлэх, цөмийн зэвсгийг үл хэрэглэх зэрэг асуудлаар үүрэг амлалтаа биелүүлэхээ нотлох нь АСЕМ-ын Дээд хэмжээний наймдугаар уулзалтын зорилго болж байна.
Уг уулзалтад оролцож буй Монгол Улсын Ерөнхийлөгч Ц.Элбэгдорж маргааш “Тогтвортой хөгжил” сэдвээр болох салбар хуралдаанд үг хэлнэ.
Х.В.Ромпуй: Харилцан итгэлцэл бол хамтын ажиллагааны үндэс суурь юм
