Монгол Улсын Ерөнхийлөгчийн зарлигаар П.Н.Шастины нэрэмжит Улсын гуравдугаар Төв эмнэлгийг Хөдөлмөрийн гавьяаны улаан тугийн одонгоор шагнасныг Ерөнхийлөгчийн Тамгын газрын дарга П.Цагаан өнөөдөр гардуулан өгөв.
П.Н.Шастины нэрэмжит Улсын гуравдугаар Төв эмнэлгийг 60 жилийн ойг нь тохиолдуулан Хөдөлмөрийн гавьяаны улаан тугийн одонгоор шагнах тухай Монгол Улсын Ерөнхийлөгчийн зарлигт “Монгол Улсын хүн ардын эрүүл энхийн төлөө өргөсөн тангарагтаа үнэнч байж, нэгэн жарны турш өөрсдийн мэдлэг, боловсрол, авьяас чадвараа дайчлан ажилласан тус эмнэлгийн үе үеийн хамт олны хичээл, зүтгэлийг үнэлж Монгол Улсын төрийн дээд одон- Хөдөлмөрийн гавьяаны улаан тугийн одонгоор шагнасугай” гэжээ.
Монгол Улсын Ерөнхийлөгчийн Тамгын газрын дарга П.Цагаан одонг тус эмнэлгийн туганд зүүж өгсний дараа баяр хүргэж үг хэллээ.
Ерөнхийлөгчийн Тамгын газрын дарга П.Цагаан хэлсэн үгэндээ “П.Н.Шастины нэрэмжит Улсын гуравдугаар Төв эмнэлгийг Хөдөлмөрийн гавьяаны улаан тугийн одонгоор шагнасныг Монгол Улсын Ерөнхийлөгчийн даалгавраар гардуулж өгөх хүндтэй үүрэг хүлээсэндээ баяртай байна. Энэхүү төрийн дээд одон бол тус эмнэлэгт ажиллаж байсан үе үеийн ахмадууд, эмч, сувилагч, нийт ажиллаж байсан хүмүүс, одоо ажиллаж байгаа хүмүүсийн хөдөлмөр, зүтгэлийг Монголын төр өндрөөр үнэлсний илрэл юм. Та бүхнийг бүгдийг нь Хөдөлмөрийн гавьяаны улаан тугийн одонгоор шагнасантай дүйж байгаа шагнал юм шүү. Та бүхэнд чин сэтгэлийн халуун баяр хүргэж, хамгийн сайн сайхан бүхнийг хүсэн ерөөе.
Гуравдугаар эмнэлгийг мэдэхгүй монгол хүн гэж байхгүй. Нэр алдар нь дандаа сайхнаар дуудагддаг. Хүн ардынхаа эрүүл мэндийн манаанд зүтгэж ирсэн алтан гартай та бүхний хөдөлмөр, бүтээл, зүтгэлийг төр өндөр үнэлж байна. Энэхүү шагналын тал нь та бүхний ирэх он жилүүдэд хийх ажлын шагнал юм гэж ойлгох хэрэгтэй. Монголчууд гадагшаа эмчилгээнд явахгүй шахам болтол нь Монгол Улсын эмнэлэг, эрүүл мэндийн салбар хөгжих ёстой. Үүнд салбартаа манлайлагч гуравдугаар эмнэлэг үлгэрлэн оройлж ажиллах ёстой. Та бүхнийг дахиад нэгэн жаранд Монголын эрүүл мэндийн салбарыг шинэ шатанд гаргахад жинтэй хувь нэмэр оруулж ажиллахыг чин сэтгэлээсээ хүсэн ерөөж байна.
Нэг жаран гэдэг улс орны хувьд харьцангуй богино, хүний амьдралын хувьд урт хугацаа. Монголчууд түүхийн олон нугачааг даван туулж, 200 гаруй жил харийн талхигдалд байсныг халж, 1911 онд үндэсний эрх чөлөө, тусгаар тогтнолоо сэргээн мандуулж, Богд хаант Монгол Улсаа байгуулсан. Үүний дараахан ардын эмнэлэг байгуулж, 60 жилийн өмнө орчин цагийн европ эмнэлэг байгуулсны анхдагч нь танай эмнэлэг байсан. Өнгөрсөн хугацаанд монголчуудад алдаа, оноо аль аль нь байсан. Сайн зүйлийг хэлбэл монголчуудын наслалт уртассан. Дундаж наслалт 40 байсан бол 25 жилийн өмнө жаран хэд болж, өнөөдөр эмэгтэйчүүдийн дундаж наслалт 70 гаруй, эрэгтэйчүүдийнх 70 руу дөхөж байна. Энэ нь хүмүүсийн эрүүл аж төрөх ёсноос гадна эрүүл мэндийн салбарын ажил, үйлчилгээ сайжирсантай холбоотой. Монгол Улс 3 сая иргэнтэй болоход танай эмнэлгийн, танай ажиллагсад, эрдэмтэн, доктор, багш нарын оруулсан хувь нэмэр их байсан. Энэ хувь нэмэрт мөн гүнээ талархаж байна.
Та бүхэнд цаашид хийх ажил их байна. Олсон ололт амжилтдаа сэтгэл ханалгүй ирэх он жилүүдэд санаачлагатай сайн ажиллах хэрэгтэй. Мэргэжлийн сургуулиудтайгаа хамтарч ажиллах хэрэгтэй. Шинжлэх ухаан, сургалтын уялдаа холбоог сайн хангаж ажиллах юм бол монголчуудад хийж, бүтээж чадахгүй ажил байхгүй. Эмч, сувилагч, ажилтнуудад баярлалаа.
Эмнэлгийн удирдлагад хандаж хэлэхэд эмнэлгийн эргэн тойрны газар их хумигдаж байна. Үүний эсрэг хатуу зогсож хамгаалах хэрэгтэй. Гадаад тохижилтдоо анхаараарай. Энэ үгийг бас Эрүүл мэнд, спортын сайдад давхар хэлж байгаа юм.
Та бүхэнд их баярлалаа. Ирж айсуй хонин жилдээ элгээрээ энх амгалан, төрлөөрөө түвшин амгалан, ажил үйлс улам бүтэмжтэй байхын ерөөлийг өргөн дэвшүүлье” гэлээ.
