АНУ-ын дэлхийд алдартай Харвардын их сургуульд сурдаг орон орны оюутны төлөөлөл Монгол Улсад зочилж байна. Монгол Улсын Ерөнхийлөгч Ц.Элбэгдорж өнөөдөр тэднийг хүлээн авч уулзлаа. Монголын Төрийн тэргүүн Харвардын их сургуулийн төгсөгч тул оюутнууд сурч буй сургуулийг нь дүүргэсэн Ерөнхийлөгчтэй уулзах хүсэлтээ илэрхийлсний дагуу уг уулзалт болсон юм.
Уулзалт Монгол орны тухай, Монголын ардчилал, түүний хэтийн төлөв, эдийн засгийн байдал, уул уурхай, бусад салбарын хөгжлийн талаар сонирхолтой өргөн хүрээнд өрнөлөө.
Харвардын оюутнууд Монгол Улсын Ерөнхийлөгчөөс олон зүйлийг асуун тодруулж, уулзалтын төгсгөлд дурсгалын гэрэл зураг татуулав. Мөн Төрийн ёслолын өргөө гэрт зочилж монгол гэр үзэж сонирхов.
