Монгол Улсын Ерөнхийлөгч Ц.Элбэгдоржийн урилгаар Унгар Улсын Ерөнхийлөгч Эрхэмсэг ноён Янош Адер гэргий Анита Херцегийн хамт Монгол Улсад албан ёсны айлчлал хийхээр өчигдөр орой Улаанбаатарт хүрэлцэн ирсэн юм.
Өнөөдөр өглөө Монгол Улсын Ерөнхийлөгч Цахиагийн Элбэгдорж, гэргий Х.Болормаагийн хамт Чингисийн талбайд Унгар Улсын Ерөнхийлөгч Эрхэмсэг ноён Янош Адер, түүний гэргий Анита Херцег нарыг албан ёсоор хүндэтгэн угтаж авлаа. Угтах ёслолд хоёр талын албаны хүмүүс оролцов.
Хоёр орны төрийн дуулал эгшиглэсний дараа Монгол Улсын Ерөнхийлөгч Цахиагийн Элбэгдорж, Унгар Улсын Ерөнхийлөгч Янош Адер нар хүндэт харуул, угтан авсан хүмүүстэй мэндчилсэн юм.
Үүний дараа Монгол Улсын Ерөнхийлөгч Цахиагийн Элбэгдорж, гэргий Х.Болормаа, Унгарын Ерөнхийлөгч Янош Адер, түүний гэргий Анита Херцег нар Эзэн Чингис хааны хөшөөнд хүндэтгэл үзүүлэв. Мөн Төрийн ордны “Баганат“ танхимд Унгарын Ерөнхийлөгч хүндэт зочны дэвтэрт гарын үсэг зурсны дараа хоёр орны Төрийн тэргүүн гэргий нарын хамт дурсгалын зураг татууллаа.
