Ойжуулалт, цаа бугын үржүүлгийн чиглэлээр хамтран ажиллахаар болов
“Дэлхийн цаасны зах зээлийн томоохон нийлүүлэгчийн хувьд ойн нөөцөө ашигтай зарцуулах нь манай улсын тэргүүлэх бодлогын нэг байдаг” хэмээн БНФУ-ын Хөдөө аж ахуй, Ойн сайд хатагтай Сиркка-Лийса Анттила хэллээ.
Тэрээр Монгол Улсын Ерөнхийлөгчтэй уулзах үеэрээ Финландын Засгийн газраас хэрэгжүүлж байгаа ойн менежментийн тухай дэлгэрэнгүй танилцуулсан юм.
Финланд Улсын газар нутгийн 70 гаруй хувь нь ой мод. Тус улсын ойн нөөцийн 60 гаруй хувийг хувийн хэвшлийнхэн эзэмшиж, модон болон модноос гаргах бүтээгдэхүүний 80 орчим хувийг тэд үйлдвэрлэж байна.
“Бид бүх зүйл эзэнтэй байх ёстой гэсэн зарчмаар ажилладаг. Ойг хоршоологчид болон хамтралуудад түрээслүүлж, эзэмшүүлж байна. Энэ бодлого оновчтой нь харагдаж байгаа” гэж хатагтай Сиркка Анттила ярилаа.
Ирэх жилийг НҮБ-аас Ойн жил хэмээн зарлахаар бэлтгэж байгаа бөгөөд энэ хүрээнд Монгол, Финланд улс хамтран ажиллах, эхний ээлжинд ойн үржүүлгийн мэргэжилтэн солилцох талаар Ерөнхийлөгч, Сайд нар тохиролцлоо. Финландын талаас, Монгол Улсын Ерөнхийлөгчийн санаачилсан “Мод тарих үндэсний өдөр” болон “Ой модны сан” зэргийг талархаж байгаагаа дурдаад, эдгээр ажлыг хэрэгжүүлэхэд техникийн туслалцаа үзүүлэхэд бэлэн гэдгээ илэрхийлэв.
Ерөнхийлөгч Ц.Элбэгдорж, монголд ойн менежментийн шинэ бодлого шаардлагатай байгааг дурдаад Финландад ойн мэргэжилтэн бэлтгэх, тус улсын ойн менежментийн туршлагыг монголд нэвтрүүлэх чиглэлээр тодорхой саналууд дэвшүүллээ.
Мөн энэ уулзалтын үеэр цаа бугын асуудлаар яриа өрнүүлэв.
Финланд Улсын хойд хэсгээр цаа буга бүхий сами үндэстэн амьдардаг. 5 мянга орчим хүн цаа бугын аж ахуй эрхэлдэг юм байна. Тэд жилд 2.5 сая кг махыг зах зээлд нийлүүлдэг. Түүнчлэн цаа бугыг үзэхээр ирж байгаа жуулчдын тоо сүүлийн жилүүдэд эрс нэмэгдсэн. Аялал жуулчлалын ирээдүйтэй хүчин зүйл болж буй учраас бид цаа бугыг хамгаалах талаар анхаарч ажиллаж байна гэж Финланд Улсын хөдөө аж ахуй, ойн сайд хэлэв.
Монголын цаа бугын үржүүлгийн асуудалд хамтрах талаар энэ уулзалтын үеэр ажил хэрэгч санал гарч байсан. Тухайлбал, гүн хөлдөөсөн үр нийлүүлэх зэргээр туслахад бэлэн гэдгээ финландын тал илэрхийллээ.
Ойжуулалт, цаа бугын үржүүлгийн чиглэлээр хамтран ажиллахаар болов
