Монгол Улсын Ерөнхийлөгчийн Олон нийтийн харилцааны бодлогын зөвлөх А.Ганбаатар “Эрүүл Монгол хайкинг клуб”-ын тэргүүн, уулын спортын олон улсын хэмжээний мастер Б.Цэвээндашийг өнөөдөр хүлээн авч уулзлаа.
2012 оны 5 дугаар сарын 19-нд далайн түвшнээс дээш 8848 метрийн өндөрт орших Эверестийн оргилд Монгол Улсынхаа төрийн далбааг мандуулж байсан уулчин Б.Цэвээндаш хоёр дахь авиралтаа хийхээр 2015 оны 4 дүгээр сарын 5-ны өдөр Эверестийг зорьсон юм. Түүнийг явахын өмнө Ерөнхийлөгчийн зөвлөх А.Ганбаатар хүлээн авч уулзаж, Монгол Улсын Ерөнхийлөгч Ц.Элбэгдоржийн “Монгол түмнийхээ хийморийг бадраагаад ирээрэй” хэмээн, гарын үсгээ зурсан төрийн далбааг гардуулж байсан билээ. Энэхүү далбааг далайн түвшнээс дээш 7180 метрийн өндөрт амжилттай мандуулаад ирсэн уулчин Б.Цэвээндаш өнөөдөр Ерөнхийлөгчийн зөвлөх А.Ганбаатарт буцаан гардуулж өглөө.
Уулчин Б.Цэвээндаш уулзалтын үеэр хэлэхдээ “Гималайн нурууны салхи шингэсэн төрийн алтан соёмбот далбаагаа эргүүлэн гардуулж байгаадаа баяртай байна. Сар гаруй үргэлжилсэн авиралтын туршид бидэнтэй сэтгэл зүрхээрээ хамт байсан, биднийг дэмжиж тусалж байсан та бүхэндээ баярлаж байна” гэв.
