Энхийг сахиулах ажиллагаанд хамтрана
Монгол Улсын Ерөнхийлөгч Ц.Элбэгдорж Бүгд Найрамдах Финланд Улсад хийж байгаа айлчлалынхаа хүрээнд тус улсын энхийг сахиулах сургалтын төв “Финсент”-д зочилж, үйл ажиллагаатай нь танилцлаа.
1956 оноос хойш Финланд Улс нь олон улсын энхийг сахиулах үйл ажиллагаанд идэвхитэй оролцож байгаа бөгөөд, одоогийн байдлаар Афганистан, Судан, Косово зэрэг олон оронд цэргээ илгээгээд байгаа юм байна.
“Финсент” нь дотооддоо төдийгүй бүс нутагтаа томоохонд тооцогдох сургалтын төв юм. Тус төвд Балти орчим, Скандинав төдийгүй дэлхийн бусад орнуудын цэрэг ,энхийг сахиулах хүчнийхэн ирж бэлтгэл сургуулилтаа хийж байна.
Финландын Батлан хамгаалах яамнаас “Цэргийн хямралын менежмент” хэмээх шинэ менежментийг хэрэгжүүлж байгаа бөгөөд энэ хүрээнд төсвийг нэмэгдүүлж, сургалтад анхаарч, НҮБ болон ЕХ-той хамтран оролцдог энхийг сахиулах ажиллагааны тоогоо нэмэгдүүлжээ.
Ерөнхийлөгч Ц.Элбэгдорж, Монгол Улсын Таван толгой дахь олон улсын сургалтын төвд зохиогддог “Хааны эрэлд” Энхийг дэмжих ажиллагааны олон улсын сургалт, дадлагад финландын цэргийн албан хаагчдыг оролцуулахыг урилаа. Мөн монголын цэргийн албан хаагчдыг сургах боломжийг судалж үзэхийг санал болгов.
Уулзалтад Зэвсэгт хүчний жанжин штабын дэд дарга, Бригадын генерал Б.Баярмагнай оролцож, сургалтын чиглэлээр хамтран ажиллах асуудлаар ярилцаж тохиролцов.
Энхийг сахиулах ажиллагаанд хамтрана
