Ерөнхийлөгч Ц.Элбэгдорж Nokia корпорацид зочлов
Финланд Улсыг дэлхийд таниулдаг алдарт брэнд бол Nokia юм. Өдрөөс өдөрт гар утасны хэрэглээ улам бүр өргөжиж, тэр хэрээр хэрэглэгчид улам боловсронгүй, үзүүлэлт сайтай, орчин үеийн шаардлагыг хангасан гар утсыг хэрэглэх болжээ. Харин Nokia энэ өрсөлдөөнд тэргүүлсээр байна.
Финланд Улсад айлчилж байгаа Монгол Улсын Ерөнхийлөгч Ц.Элбэгдорж харилцаа холбооны тэргүүлэгч үйлдвэрлэгч болох Nokia-д зочиллоо. Тус брэнд дэлхийн 150 орны зах зээлд нэвтэрч, 9 оронд үйлдвэрлэл явуулж байна.
“Сүүлийн жилүүдэд гар утас хэрэглэгчид, тэр дундаа Nokia-гийн хэрэглэгчдийн тоо санаанд оромгүй байдлаар өсч байна. Энэ нь биднийг улам бүр хариуцлагатай болгож, өдөр тутам шинэ дэвшил, шинэ технологи хайхад хүргэж байна. Бид энэ үүргээ хэрэглэгчдийнхээ өмнө биелүүлж байгаадаа баяртай байдаг” хэмээн тус корпорацийн Дэд Ерөнхийлөгч Эско Ахо ярилаа.
“Улам бүр даяаршиж байгаа энэ цаг үед гар утас зөвхөн харилцаа холбооны хэрэгсэл төдийгүй, боловсрол, соёл, эдийн засаг, тэр ч байтугай засаглалын чухал хэрэгсэл болж байна. Тиймээс бид ч бас хоцрох ёсгүй” гэж тэрээр хэлсэн. Мөн 10 жилийн өмнө гар утасны хувьд техник үзүүлэлт нь голлох үзүүлэлт байсан бол өнөөдөр программ хангамж нь голлох үзүүлэлт болоод байгааг тэмдэглэж байв.
Nokia корпораци жил бүр нийт орлогынхоо 14.4 хувийг шинэ технологийн судалгаа шинжилгээнд зарцуулдаг бөгөөд судалгаа шинжилгээний зориулалтаар 5.6 тэрбум еврогийн хөрөнгө оруулалт хийжээ.
1865 онд Тампере хотод анх үүссэн энэхүү компани 1960 оноос цахилгаан барааны бизнест хөл тавьж, 1967 оноос Nokia хэмээн нэрлэгдэх болжээ.
Ноён Эско Ахо Nokia корпорацийн түүхэн замнал, өнөөгийн байдал, хэтийн төлвийн талаар товч ярьсны дараа шинэ бүтээгдэхүүнээ танилцуулав. 20 жилийн өмнөх алдарт “Горбачёв” загвар болон долоохон хоногийн өмнө зах зээлд нэвтэрсэн шинэ N8 загварын хооронд асар их ялгаа бий болсныг Nokia-гийн төв байран дахь үзэсгэлэнгээс харж болохоор байна.
Мөн тус компани ирэх сард ажил хэрэгч хүмүүст зориулсан E7, залуучуудад зориулсан N3 загварын утсуудыг зах зээлд гаргах гэж байгаагаа мөн танилцууллаа.
Ази тив Nokia-гийн хэрэглээгээр Европын дараа ордог. Харин манай улсын хувьд нийт үүрэн холбооны хэрэглэгчдийн 50 гаруй хувь нь Nokia барьдаг гэсэн албан бус тоо байдаг юм байна.
Ерөнхийлөгч Ц.Элбэгдорж Nokia корпорацид зочлов
