Тамирчдад шагнал, өргөмжлөл гардуулав
Монгол Улсын Ерөнхийлөгчийн зарлигаар олон улсын хэмжээний их мастер Б.Мөнгөнтуулыг шатрын оюутны дэлхийн аваргын тэмцээнд түрүүлэн алтан медаль хүртсэнийг үнэлэн Хөдөлмөрийн гавьяаны улаан тугийн одонгоор, шатрын холбооны тамирчин Б.Гүндавааг амжилттай оролцсоных нь төлөө Хөдөлмөрийн хүндэт медалиар шагнасан билээ. Уг шагналыг Ерөнхийлөгчийн Тамгын газрын дарга Д.Баттулга өнөөдөр төрийн ордонд гардуулж баяр хүргэв.
Мөн тэрээр МУИС-ийн оюутан, Өсвөрийн дэлхийн аваргын алтан медальт шатарчин А.Энхтуул, ХААИС-ийн оюутан, буудлагын спортын түүхэнд залуучуудын дэлхийн аваргын анхны алтан медалийг эх орондоо авчирсан Ц.Хонгорзул нарт Монгол Улсын Ерөнхийлөгчийн нэрэмжит тэтгэлэг олгох өргөмжлөлийг гардууллаа. Ерөнхийлөгчийн Тамгын газрын дарга Д.Баттулга эдгээр тамирчин залуучуудад спорт, сурлагын өндөр амжилт хүсэв.
Тамирчдад шагнал, өргөмжлөл гардуулав
