Засгийн газар хоорондын сэргээгдэх эрчим хүчний байгууллага (ЗГХСЭХБ), Их Британи, Умард Ирландын Вант Улсад төвтэй Хюманитад олон улсын төрийн бус байгууллагын санаачилсан Үлгэр жишээ бохирдолгүй хөгжлийн санаачилгыг хэрэгжүүлэх анхны орноор Монгол Улсыг сонгосон болохыг албан ёсоор зарласан ёслолын арга хэмжээ 2010 оны 10 сарын 10-11-ний өдрүүдэд АНУ-ын Нью-Уорк хотод зохион байгуулагдлаа.
Энэхүү арга хэмжээнд Хюманитад олон улсын төрийн бус байгууллагыг үндэслэн байгуулагч Саша Стоун, ЗГХСЭХБ-ын Ерөнхий нарийн бичгийн дарга Ровсон Мелло, тус байгуулллагын Эдийн засгийн инновацийн хорооны дарга бөгөөд АНУ-ын М-САМ компанийн Ерөнхий захирал Дэвид Мартин, Монгол Улсын Ерөнхийлөгчийн ахлах зөвлөх П. Цагаан, Монгол улсаас НҮБ-д суугаа Байнгын төлөөлөгч О.Энхцэцэг нарын албаны хүмүүс оролцов.
Үлгэр жишээ бохирдолгүй хөгжлийн санаачилгa нь бизнесийн шинэ загвар болох ёс зүйтэй бизнесийн зарчим дээр үндэслэгдэх бөгөөд дотоодын бизнес эрхлэгчид болон эрдэм шинжилгээ, судалгааны хүрээлэн, төвүүдэд технологийн дамжуулалт хийх лиценз олгох замаар Монгол Улсын технологийн чадавхийг нэмэгдүүлж, тогтвортой хөгжлийг хангахад томоохон хувь нэмэр оруулна хэмээн энэхүү үйл ажиллагааг санаачлагч, дэмжигчид үзэж байна.
Бохирдолгүй хөгжлийн санаачилгыг хувийн салбарын дэмжлэгтэйгээр хэрэгжүүлнэ. Уг санаачилгын гол зорилго нүүрс хүчлийн хийн ялгарлыг багасгаж, улмаар тэглэх; газрын гадаргын усны ашиглалтыг сайжруулан, цэвэршүүлж дахин ашиглах; үйлдвэрлэлд аль болох ус бага хэрэглэдэг технологи нэвтрүүлэх; хөдөө орон нутгийг эрчим хүчээр найдвартай хангахуйц оновчтой шийдэл олж, амьдралд нэвтрүүлэх зэргээс гадна үйлдвэрлэлийн явц, уул уурхайн үйлдвэрлэлийн үйл ажиллагаанд дотоодын оролцоог эрс нэмэгдүүлэх; мөн түүний байгаль орчинд нөлөөлж буй сөрөг нөлөөллийг багасгах үүднээс нүүрс, зэс, алт болон ураны олборлолт, боловсруулалтад хамгийн дэвшилтэт технологийг нэвтрүүлэх, элэгдэж хуучирсан машин техникээс үүдэлтэй агаарын бохирдлыг арилгах зорилгоор тээвэр, логистикийн дэвшилтэт технологийг ашиглах боломж бүрдүүлэх явдал ажээ.
