Монгол Улсын Ерөнхийлөгчийн мэндчилгээ
“Хөдөлмөр - хөгжлийн үндэс” үндэсний чуулганд оролцогчдод
Хүндэт хатагтай, ноёд оо, Эрхэм зочид, төлөөлөгчид өө,
Саяхан эдийн засгийн салбар дахь 2010 оны Нобелийн шагналыг хөдөлмөрийн зах зээл, хөдөлмөрийн харилцааны асуудлаар хийсэн судалгаа, нээлтүүдээрээ нэр бүхий гурван эрдэмтэн хүртсэнийг Та бүхэн мэдэж байгаа. Энэ нь хөдөлмөрийн харилцааны асуудал нь нийгэм, эдийн засгийн хамгийн гол асуудлуудын нэг болохыг дэлхий нийтээр хүлээн зөвшөөрч буй, ач холбогдлыг нь үнэлж байгаагийн илрэл юм.
Монгол Улс эдийн засгийн хөгжлийн чанарын шинэ шатандаа орж байна. Уул уурхай, дэд бүтцийн салбарт дэлхийн хэмжээний том төслүүд хэрэгжиж эхэлж байна. Хөрөнгө оруулалт бүтээн байгуулалтын асар их ажил бидний өмнө байна. Монгол Улсад ажилгүй нэг ч хүн, хөдөлмөр эрхлэ эгүй нэг ч хүн байх ёсгүй тийм цаг үе мөдхөн ирнэ гэдэгт итгэл төгс байна.
Дэлхийн санхүү, эдийн засгийн хямралд хамгийн хүндээр нэрвэгдсэн орны нэг нь Монгол Улс. Эдийн засгийн мөчлөгийн уналтаас шалтгаалж, мөн түүнчилэн хөдөлмөрийн зах зээлийн зохицуулалт хангалтгүй байгаагийн улмаас ажилгүйдэл, ядуурлын түвшин төдийлөн буурахгүй байгаад олон нийтийн зүгээс ихээхэн шүүмжлэлтэй хандаж байгаа билээ. Энэ бол зүй ёсны, үндэслэлтэй шүүмжлэл гэж үзэж байна.
Нэг талаас ажилгүйдлийн хэмжээ төдийлөн буурахгүй байгаа боловч нөгөө талаас томоохон төсөл хэрэгжүүлж буй байгууллага, компаниудад мэргэжлийн боловсон хүчин байнга дутагдаж байгаад бид дүгнэлт хийх ёстой. Үндэсний боловсон хүчний өрсөлдөх чадварыг сайжруулах нь Та бидний эрхэм зорилго байх ёстой.
Эдийн засгийн төв байгууллагууд дээр хийгдсэн нэгэн судалгаагаар Монгол Улс ойрын үед ажиллах хүчний эрэлт хэрэгцээгээ даахгүй, гаднаас энэ хэрэгцээгээ хангах шаардлага гарах тухай анхааруулсан байдаг. Хүний нөөц, ажиллах хүчний хэрэгцээ, түүнийг хангах бодлого, арга замын талаар иж бүрэн судалгаа хийж үндэсний хэмжээний хөтөлбөр боловсруулж цаг алдалгүй хэрэгжүүлэх шаардлага Та бидний өмнө тулгарч байна. Энэ асуудлыг хөдөлмөрийн харилцааны асуудлыг хариуцсан чиг үүргийн байгууллага нь бодлогын хувьд зангидан арга хэмжээ авах нь зүйтэй.
Өнөөдөр бид уул уурхай, дэд бүтцийн асуудал дээр хэт илүү анхаарал тавиад бусад салбарын асуудлыг урсгалаар орхиж огт боломгүй байна. Малчид, хувиараа хөдөлмөр эрхлэгчдийг зохион байгуулалтад оруулах, тэдний нөхөрлөл, хоршоо байгуулах санаачилгыг бүх талаар дэмжих нь чухал байна.Манайтай ижил төстэй нөхцөлтэй, өндөр хөгжилтэй улс орнуудын туршлагаас үзвэл хөдөө аж ахуйн салбар нь бүхэлдээ буюу дийлэнхи нь хоршооны хэлбэрээр зохион байгуулагдсан, иймээс ч энэ салбар нь өндөр хүчин чадалтай, өрсөлдөх чадвар сайтай байдаг байна. Манайд энэ туршлагыг хэрхэн нэвтрүүлж болох вэ гэдэг нь нухацтай авч үзэх асуудал яах аргагүй мөн.
Хөдөлмөрийн харилцааг зохицуулсан хууль тогтоомжийг боловсронгуй болгох, хөдөлмөрийн зах зээлд өрсөлдөх чадвар султай ажлын туршлагагүй залуус, ахимаг насныхан, хөгжлийн бэрхшээлтэй иргэдийн хөдөлмөрлөх эрхийг баталгаажуулах, ажиллагсдын хөдөлмөр хамгаалал, эрүүл ахуй, ажиллах нөхцөлийг сайжруулах, нийгмийн баталгааг хангах, хүүхдийн хөдөлмөрийг мөлжих явдалтай тууштай тэмцэх чиглэлээр хөдөлмөрийн хууль тогтоомжийг шинэчлэх шаардлага байгаа юм.
Чухамхүү эдгээр асуудалд Хөдөлмөрийн үндэсний чуулганзохих хариу олж чадна гэж найдаж байна.
Хөдөлмөр- хөгжлийн үндэс сэдвийн дор зохион байгуулагдаж байгаа Хөдөлмөрийн үндэсний чуулганы үйл ажиллагаанд амжилт хүсье.
МОНГОЛ УЛСЫН ЕРӨНХИЙЛӨГЧЦАХИАГИЙН ЭЛБЭГДОРЖ
2010 оны 10 дугаар сарын 14
Монгол Улсын Ерөнхийлөгчийн мэндчилгээ
