Олон улсын валютын сангийн төлөөлөгчдийг хүлээн авч уулзав
Улсын Ерөнхийлөгч Ц.Элбэгдорж, Олон улсын валютын сангийн Монголыг хариуцсан ажлын хэсгийн ахлагч бөгөөд Ази Номхон далайн газрын хэлтсийн дарга Стивен Барнетт, ОУВС-ийн Монгол дахь суурин төлөөлөгч Пармешвар Рамлоган нарыг өнөөдөр хүлээн авч уулзлаа.
Монгол Улсын Засгийн газар болон ОУВС-ийн хооронд тохиролцсон Stand by хөтөлбөрт энэ оны 10-р сарын нэгэнд дуусч байгаа бөгөөд уг хөтөлбөрийг амжилттай хэрэгжсэн гэж үзэж байгаагаа ноён Стивен Барнетт хэллээ.
“Бид Монгол Улсын Их хурал, Засгийн газар, монголын ард түмэнтэй хамтран ажилласандаа таатай байна. Ази Номхон далайн бүс нутагт энэхүү хөтөлбөр амжилттай өндөрлөж байгаа анхны орон нь Монгол Улс болж байна. Мэдээж, дэлхийн санхүү, эдийн засгийн хямрал гэх мэт хэцүү цаг үе байсан ч Засгийн газар, Төв банк шийдвэртэй арга хэмжээнүүдийг тухай бүрт авч байсныг сайшаан тэмдэглэх хэрэгтэй” гэж тэрээр хэлсэн юм.
Ерөнхийлөгч Ц.Элбэгдорж, Монгол Улс ардчилсан нийгмийг сонгосноос хойш олон улсын санхүүгийн байгууллагууд, тэр дундаа ОУВС тусалж, дэмжиж ирсэнд талархаж байгаагаа илэрхийллээ.
“Хүнд хэцүү үед бидэнд тусалж, дэмжиж байсан Та бүхэнд талархаж байна. Бид нэгэнт хүлээсэн үүргийн дагуу авсан амлалтаа хэрэгжүүлэх ёстой гэсэн байр суурь баримталж ирлээ. Хэдийгээр энэ хөтөлбөр хэрэгжиж дууссан ч гэсэн Монголын тал хатуу амлалт болзол хүлээлгүйгээр цаашдаа бидэнд хамтран ажиллах олон чиглэл бий гэж үзэж байна. Ялангуяа орон нутгийн эрх мэдлийг нэмэгдүүлэх, төсвийг нь шинэтгэх бодлогыг хэрэгжүүлж, иргэдийн оролцоог нэмэгдүүлэх шаардлагатай байгаа. Мөн банкны салбарын тогтвортой, найдвартай үйл ажиллагааг хангах талаар дорвитой арга хэмжээ авч хэрэгжүүлэхэд Монгол банк, Засгийн газарт туслах, эдийн засгийн төв байгууллагуудын бодлогын уялдааг сайжруулах тогтолцоо бий болгоход туслах болон бусад техникийн хамтын ажиллагаануудыг дурдаж болох юм” гэж Ерөнхийлөгч ярилаа.
Ерөнхийлөгч мөн тогтвортой хөгжлийн үндэс суурь нь дунд давхрагынхныг дэмжсэн бодлого юм гэсэн байр суурьтай байгаагаа хэлсэн. “Малчид, жижиг дунд бизнес эрхлэгчид банкнаас өндөр хүүтэй зээл авч, бага ашигтай бизнес эрхэлж, өрнөөс өрний хооронд амьдарч байгаа. Ийм байдал нь дунд давхрагынхны тоо шахагдаж хумигдахад хүргэж байна. Томоохон уул уурхайн төслүүдээс орох орлого иргэн бүрт хүртээмжтэй байх ёстой. Боловсрол, эрүүл мэндийн салбарт хөрөнгө оруулах нь эн тэргүүний зорилт учир нь, боловсролтой, эрүүл хүн тогтвортой хөгжлийн үндэс суурь юм” гэлээ.
Энэ уулзалтын үеэр Монгол Улсын эдийн засгийн байдал, банкны салбарын тухай болон Ерөнхийлөгчийн санаачилсан Төсвийн тухай шинэчилсэн хуулийн төслийн талаар ярилцаж санал бодлоо солилцсон.
Уулзалтын төгсгөлд The Economist, Financial Times сонинуудын сурвалжлагчид Монгол Улсын Ерөнхийлөгчөөс ярилцлага авлаа.
Олон улсын валютын сангийн төлөөлөгчдийг хүлээн авч уулзав
