Ерөнхий прокурорын орлогчийг зөвшилцөхөөр өргөн мэдүүлэв
Монгол Улсын Ерөнхийлөгч хуулиар олгогдсон бүрэн эрхийнхээ дагуу Улсын Ерөнхий прокурорын саналыг үндэслэн Цэндсүрэнгийн Бямбацогтын нэрийг Улсын Ерөнхий прокурорын орлогчоор томилох тухай зөвшилцөхөөр Улсын Их Хуралд өргөн мэдүүллээ.
Ц.Бямбацогт нь 1958 онд Улаанбаатар хотод төрсөн, 52 настай, эхнэр хүүхдийн хамт амьдардаг.
Хуучнаар ЗХУ-ын Ташкентын их сургууль, Монгол Улсын их сургуулийг тус тус төгссөн. Хууль зүйн магистр зэрэгтэй.
Бямбацогт нь Шүүх яамны хууль боловсруулах системчлэх хэлтэст мэргэжилтэн, Олон улсын геологийн экспедицийн хуулийн зөвлөх, бүрэн эрхт төлөөлөгчдийн нарийн бичгийн дарга, Геологийн яаманд хуулийн хэлтсийн зөвлөх, Сүхбаатар дүүргийн прокурорын газарт хяналтын прокурор, Улаанбаатар хотын прокурорын газарт хяналтын прокурор, Баянгол дүүрэгт ахлах прокурор, Улсын Ерөнхий прокурорын газарт хяналтын прокурор, Иргэний бүртгэл мэдээллийн улсын төвд хяналт шалгалтын хэлтсийн дарга зэрэг албыг хашиж байгаад 2009 онд Улсын бүртгэлийн ерөнхий газрын орлогч даргаар томилогдсон юм.
Ц.Бямбацогтын ажил хэргийн чадвар, мэргэшил, төрийн албаны дадлага туршлага, ёсзүйн байдал, прокурорын байгууллагад олон жил үр бүтээлтэй ажиллаж байсан зэргийг харгалзан, Улсын Ерөнхий прокурорын саналыг үндэслэн ийнхүү Улсын Ерөнхий прокурорын орлогчоор томилох саналтай байгаагаа Ерөнхийлөгч Улсын Их Хуралд өргөн мэдүүлэв.
Ерөнхий прокурорын орлогчийг зөвшилцөхөөр өргөн мэдүүлэв
