Монгол Улсын Ерөнхийлөгчийн Тамгын газрын нэрэмжит футзалын тэмцээн энэ амралтын өдрүүдэд болов. Хоёр өдөр үргэлжилсэн энэ тэмцээнд Монгол Улсын Ерөнхийлөгчийн Тамгын газар, УИХ-ын Тамгын газар, Засгийн газрын Хэрэг эрхлэх газар, Сангийн яам, БХЯ, ГХЯ, ҮАБЗ зэрэг 13 байгууллагын эрэгтэй, эмэгтэйчүүдийн хөлбөмбөгийн багууд оролцон өрсөлдлөө.
Тэмцээний дүн өнөөдөр гарч, эрэгтэйчүдийн хөлбөмбөгийн багуудаас Сангийн яамны тамирчид тэргүүн байр эзэлж, УИХ-ын Тамгын газар, ҮАБЗ-ийн багууд удаалав. Эмэгтэйчүүдээс Барилга, хот байгуулалтын яамны баг шилдгээр тодорч, Аж үйлдвэрийн яам, Батлан хамгаалах яамны багууд хоёр, гуравдугаар байрт шалгарав.
Түрүүлсэн багуудад Монгол Улсын Ерөнхийлөгчийн Тамгын газрын нэрэмжит футзалын тэмцээний цомыг Ерөнхийлөгчийн зөвлөх, Монголын Хөлбөмбөгийн холбооны ерөнхийлөгч А.Ганбаатар гардуулан өгч, тамирчдад баяр хүргэлээ.
