Ерөнхийлөгч иргэдийн оролцоотой хөгжлийг дэмжиж байна
Монгол Улсын Ерөнхийлөгчийн ивээл дор “Сайхан хот-сайхан амьдрал” уриа бүхий иргэдийн оролцоотой хөгжлийг дэмжих өдөрлөг нийслэлийн ууган гуравдугаар сургууль дээр өнөөдөр боллоо. Өдөрлөгт Дархан, Булган, Сүхбаатар, Төв, Сэлэнгэ, Хэнтий аймгийн болон Улаанбаатар хотын Сүхбаатар, Багануур дүүргийн хуримтлалын бүлгийн төлөөлөгчид, нийлсэлийн гуравдугаар сургуулийн сурагчид цугларсан байв.
Дэлхийн хүн амын суурьшлын өдөр, Хот байгуулалтын мэдээлэл судалгааны төвийн таван жилийн ойг тохиолдуулан хийж буй энэ өдөрлөгийн үеэр гэр хорооллын иргэд хуримтлалын бүлэг үүсгэн хамтран ажиллаж амьдрах орчин нөхцлөө сайжруулж байгааг дэмжин олон нийтэд сурталчилж, гуравдугаар сургуульд хуримтлалын бүлгүүдийн нэрэмжит цэцэрлэгт хүрээлэн байгуулах эхлэлийг тавьж 108 мод суулган, “Сайхан хот-сайхан амьдрал” гар зургийн уралдаанд шалгарсан сурагчдыг шагналаа.
Энэ арга хэмжээнд Ерөнхийлөгчийн Тамгын газрын дарга Д.Баттулга оролцон үг хэлэхдээ, “Монгол оронд үүсэн байгуулагдсан 150 гаруй хуримтлалын бүлгийг төлөөлөн хот, хөдөөгийн олон арван хүн, тэдний үүсгэл санаачилгыг хамгийн сайн ойлгож гар зургаараа дэмжиж буй хүүхдүүд энд цугласан байна. Монгол Улсын Ерөнхийлөгч саяхан Төв аймгийн Баянчандмань суманд ажиллахдаа ийм бүлэг байгуулсан хүмүүстэй уулзаж, хийсэн бүтээсэнтэй нь танилцаад энийг л дэмжих шаардлагатай юм байна гэж хэлсэн юм. Өөрсдөө бага багаар хуримтлал бий болгон амьдрах орчноо өөрчлөн сайжруулж, шинийг сэдэж ихийг бүтээж байгаа та бүхэнд амжилт хүсэн ерөөе. Энэ үүсгэл санаачилгыг Монгол Улсын Ерөнхийлөгч, түүний Тамгын газар бүх талаар дэмжих болно” гэж хэлэв.
Мөн Монгол Улсын Ерөнхийлөгч Ц.Элбэгдоржоос 5 жилийнхээ ойг тэмдэглэж байгаа Хот байгуулалтын мэдээлэл судалгааны төвд гэр хорооллын иргэдийн дунд хуримтлалын бүлэг хэмээх иргэд оршин суугчдын сайн дурын хамтын ажиллагааны эхлэлийг тавьж, түүнийгээ түгээн дэлгэрүүлэхээр чармайж буй зүтгэлийг нь үнэлэн, “Талархалын бичиг” ирүүлснийг тэрээр уншин тус төвийн тэргүүн Ц.Энхбарт гардууллаа.
Энэхүү хуримтлалын бүлгийн үүсгэл санаачилга, ажлыг дэмжин Монгол Улсын Ерөнхийлөгч бас Зарлиг гаргасныг Ерөнхийлөгчийн хот, хөдөөгийн хөгжлийн бодлогын зөвлөх Л.Эрхэмбаяр оролцогчдод уншин танилцуулав.
Нэг дор амьдарч буй иргэд сайн дураараа бүлэгт нэгдэн, өдөр болгон 100-300 төгрөг хүн бүр нийлүүлж хуримтлал үүсгэн, орчноо цэцэрлэгжүүлэх, тохижуулах, жижиг аж ахуй эрхлэх, ногоо, мод бут тарих, үйлдвэрлэл, үйлчилгээний цэг байгуулах, хэрэгцээ гарсан нэгэндээ бага хүүтэй зээл олгох зэргээр шинэ санаачилга гарган ажиллаж байна. Ийм бүлгийн ажилтай Монгол Улсын Ерөнхийлөгч Төв аймгийн Баянчандмань суманд саяхан танилцахдаа ихэд олзуурхан дэмжиж, улс даяар дэлгэрүүбэл зүгээр юм байна хэмээсэн билээ. Энэ нь зээлийн баталгаа гаргаж чадахгүй иргэдэд хүссэн зүйлээ хийх, зээл авах боломж олгосон үнэхээр ядуурлыг бууруулах, ажлын байр нэмэгдүүлэх, орчноо сайхан болгох шинэ боломж юм.
Тэд үйл ажиллагаагаа нь жигдрээд ирэхээр янз бүрийн төсөл бичиж, гадаад, дотоодын байгууллага, хүмүүсээс дэмжлэг, банкнаас жижиг зээл авч ажилладаг юм байна. Сайн үйлийг бага зүйлээс эхлэхэд багаддаггүй гэдгийг, төрийн байгууллага, улсын төсөв харж суулгүй амьдралаа, орчноо өөрчилж болдгийг тэд бусдад үлгэрлэн үзүүлж чадсан үнэхээр дэмжүүштэй үүсгэл санаачилга байсан юм.
Ерөнхийлөгч иргэдийн оролцоотой хөгжлийг дэмжиж байна
