Монгол Улсын Ерөнхийлөгч Ц.Элбэгдорж өнөөдөр АНУ-ын Бостоны Дүрслэх урлагийн музейн төлөөлөгчдийг хүлээн авч уулзав. Уулзалтад тус музейн захирал М.Тейтелбаум болон А.Ганд, Г.Ганд, тус музейн хэлтсийн дарга Л.Тарлоу нарын зэрэг хүмүүс оролцлоо.
Монгол Улсын Ерөнхийлөгч Ц.Элбэгдорж тэдэнтэй уулзахдаа улс төрийн хажуугаар уран зураг сонирхдог талаараа танилцуулж, энэ нь түүний амьдралыг олон талтай болгодог тухай ярьж байлаа. Монголд эртнээс дүрслэх урлаг хөгжиж ирсний сацуу социализмын үед тухайн үеийн үзэл суртлаас хамааран социалист реализмын арга давамгайлж байсан талаар уулзалтад оролцогчдод сонирхуулав.
Тэрээр мөн Иран, Саудын Араб, Кувейт зэрэг оронд айлчилж байхдаа тэндхийн музейд Монголын дүрслэх урлагтай холбоотой бүтээлүүд үзэж сонирхож байснаа дурссан юм.
Энэ үеэр мөн Харвардын Их сургуулийн Кеннидийн сургуульд суралцан төрийн удирдлагын магистр цол хамгаалсан талаараа дурсан ярьж, өнөөдрийг хүртэл Харвардын бөгжийг дурсгал болгон зүүж явдгаа хэллээ.
Уулзалтад оролцогчид урлаг, уран зураг болон Монголын ардчиллын талаар сонирхсон зйүлсээ асууж хариулт авав.
