Харилцаагаа эдийн засаг, худалдаа, хөрөнгө оруулалтын агуулгаар өргөжүүлэхийг хүслээ
Монгол Улсын Ерөнхийлөгч Ц.Элбэгдоржид Тайланд Улсаас Монгол Улсад суух Онц бөгөөд Бүрэн эрхт элчин сайд Пиамсак Милинтачинда итгэмжлэх жуух бичгээ өнөөдөр өргөн барилаа. Ерөнхийлөгч Ц.Элбэгдорж түүнийг итгэмжлэх жуух бичгээ барьсантай нь холбогдуулан хүлээн авч уулзав.
Ерөнхийлөгч Эрхэмсэг Гүнж Сириндхорн 2009 онд Монгол Улсад хоёр дахь удаагаа айлчилж, орон нутгийн сургуульд өөрийн ивээлийн дор төсөл хөтөлбөр эхлүүлсэн нь хоёр орны харилцааны хөгжилд урам түлхэц өгөх алхам болсныг онцлон тэмдэглээд Монгол Улс эрдэс баялгийн нөөцийг ашиглах, дэд бүтцийг хөгжүүлэх зэрэг хөгжлийн томоохон зорилт тавьж ажиллаж буй энэ үед хоёр талын хамтын ажиллагааг эдийн засаг, худалдаа, хөрөнгө оруулалтын агуулгаар өргөжүүлэх чиглэлээр манай холбогдох яам байгууллагуудтай хамтарч идэвхтэй ажиллахыг Элчин сайдаас хүслээ. Мөн Тайландтай бүс нутгийн хэмжээнд идэвхтэй хамтран ажиллах сонирхолтой байдгийг дурдсан юм.
Элчин сайд Пиамсак Милинтачинда 1950 онд төрж, Бангкокийн Чулалонгкорнын их сургууль, АНУ-ын Вейнигийн их сургууль,Тайландын үндэсний батлан хамгаалахын коллеж тус тус дүүргэжээ. Тэрээр Гадаад харилцааны яамны Эдийн засгийн газрын Олон улсын эдийн засгийн хэлтэст атташе, гуравдугаар нарийн бичгийн дарга, Эрх зүйн газар, АСЕАН-ы газарт хоёрдугаар, нэгдүгээр нарийн бичгийн дарга, дэд ерөнхий захирал, Хойт Америкийн хэлтсийн дарга, Европын газарт дэд ерөнхий захирал, Тайландын олон улсын хамтын ажиллагааны агентлагийн ерөнхий захирал, АПЕК-ийн НБДНГ-т дэд гүйцэтгэх захирал болон гүйцэтгэх захирал зэрэг алба хашиж байснаас гадна Сингапур, АНУ, Унгар, Хятадад нарийн бичгийн дарга, элчин сайдаар ажилласан туршлагатай дипломатч юм.
Монгол Улс, Тaйлaндын Вaнт Улсын хооронд мaнaй тaлын сaнaaчилгaaр 1974 онд дипломaт хaрилцaa тогтоожээ. Монгол Улс Элчин сайдын яамаа Бангкокт 2000 онд нээсэн байна. Манай оронд aрдчилсaн өөрчлөлт, шинэчлэл эхэлснээс хойш АСЕАН–ы гишүүн орнууд дотроос Тaйлaнд Улс Монголыг хaрьцaнгуй илүү сонирхож, хaрилцaa хөгжүүлэх идэвх гaргaх болсон байна.
Тaйлaнд Улс Монголд хaндивлaгчдын уулзaлтaд оролцож, 1994 онд эдийн зaсгийн хүндрэл бэрхшээлийг дaвaхaд зориулaн хоёр сaя бaтт (80 гaруй мянгaн aм.доллaр)-ын, ой хээрийн түймрийн хохирлыг aрилгaхaд 500 мянгaн бaтт (19.700 aм.доллaр)–ын буцaлтгүй туслaмж үзүүлсэн. 2000, 2001 онд зудад нэрвэгдсэн малчдад тусламж болгон тус бүр 10 мянган ам.долларын тусламж үзүүлж байв.
хоёр талын худалдааны эргэлт 2007 онд 5.4 сая ам. доллар, 2008 онд 17.2 сая ам доллар болсон ажээ. Манай улс Тайландад оёмол бүтээгдхүүн, тээврийн хэрэгслийн эд анги экспортолсон бол Тайландаас элсэн чихэр, будаа, хана шалны хуванцар хулдаас, цаас картон, угаалгын бодис, шингэн бодисын хэмжүүртэй буюу хэмжүүргүй насос, цахилгаан үүсгүүрийн төхөөрөмж зэргийг импортолдог.
2004 оны 12 дугаар сарын 26-нд болсон далайн хүчтэй давалгаа цунамид Тайландын өмнөд мужууд нэрвэгдэж, хүний амь эрсдэн, эдийн засгийн хохирол учирсантай холбогдуулан манай Засгийн газраас тус улсад 10.000 ам.долларыг буцалтгүй тусламж болгон хандивласан байна.
Тайландад жуулчлал, эмчилгээний чиглэлээр зорчиж буй монголчуудын тоо сүүлийн жилүүдэд огцом нэмэгдэх болсон. Энэ нь манай орнуудын хооронд 30 хоногийн хугацаанд иргэд визгүй зорчих болсонтой ч бас холбоотой юм.
Харилцаагаа эдийн засаг, худалдаа, хөрөнгө оруулалтын агуулгаар өргөжүүлэхийг хүслээ
