Монгол Улсын Ерөнхийлөгчийн зарлигаар 2010 оноос эхлэн жил бүрийн тав, аравдугаар сарын хоёр дахь долоо хоногийн бямба гаригийг "Бүх нийтээр мод тарих үндэсний өдөр" болгон зарлаж байгууллага, аж ахуйн нэгж, иргэд мод тарьж заншаад байгаа билээ. Ерөнхийлөгчийн зарлигийн дагуу өнөөдөр буюу тавдугаар сарын 14-ний бямба гаригт Монгол орон даяар мод тарих үндэсний өдрийг тэмдэглэж мод, бут тарих хөдөлгөөн өрнүүллээ.
Монгол Улсын Ерөнхийлөгчийн Тамгын газрын албан хаагчдын төлөөлөл энэ өдөр Үндэсний цэцэрлэгт хүрээлэнгийн “Хайрын төгөл”-ийг чимэглэхээр эрт цэцэглэдэг, анхилуун үнэртэй 40 ширхэг монос модыг сонгон тарьсан юм.
Ерөнхийлөгчийн зарлигаар "Бүх нийтээр мод тарих үндэсний өдөртэй болсноос хойш зургаан жил өнгөрч байна. Ерөнхийлөгчийн санаачлагаар шинээр суулгасан моддыг цахим бүртгэлжүүлж, тарьсан мод бүрт QR код бүхий чип зүүж, холбогдох мэдээллийг цахим санд байршуулах шинэ үйлчилгээг Үндэсний цэцэрлэгт хүрээлэн нэвтрүүлсэн байна.
Ингэснээр тухайн модны чип дэх кодыг гар утас болон цахим төхөөрөмжөөр уншуулахад хэн, хэзээ тарьсан талаар болон тухайн модны талаар холбогдох бүхий л мэдээллийг авах боломжтой юм.
