Монгол Улсын Ерөнхийлөгч Ц.Элбэгдорж өнөөдөр Эмнести Интернэшнл олон улсын байгууллагын Зүүн Азийн хөтөлбөрийн дэд дарга Розан Райф болон зохицуулагч Кэтрин Берраклу нарыг хүлээн авч уулзлаа.
Ерөнхийлөгч Ц.Элбэгдорж, Монгол улсад хүний эрхийг хамгаалах, эрүүдэн шүүхийг таслан зогсоох чиглэлээр Эмнести Интернэшнл байгууллага идэвхтэй ажиллаж, ямагт анхаарал тавьсаар ирсэнд талархлаа илэрхийллээ. Бүрэн эрхээ хэрэгжүүлэх хугацаандаа хүний эрхийг бүх талаар баталгаажуулахын төлөө анхаарал тавин ажиллах болно гэдгээ Ерөнхийлөгч дахин нотлов.
Эмнести Интернэшнл нь 2008 оны 7-р сарын 1-ний өдөр Улаанбаатарт болсон жагсаал цуглааны, түүний үр дүнд болсон үймээн самуун, хүний амь эрсэдсэн хэргийг хэрхэн шийдвэрлэж байгаа, мөн мөрдөн байцаах ажиллагааг ямар байдлаар явуулж байгаа талаар 2009 оны тайландаа дурдсан билээ. Цаашдаа ч энэ асуудал руу анхаарлаа хандуулсан хэвээр байх болно гэдгээ хатагтай Розан Райф илэрхийллээ.
Уулзалтанд оролцогсод мөн саяхан батлагдсан өршөөлийн хуулийн талаар, монгол улсад хэрэгжсээр байгаа цаазаар авах ялын тухай болон эрүүдэн шүүхийг устгах талаар санал солилцлоо.
