Европын Холбооны хамтын санхүүжилттэй Эдийн засгийн хамтын ажиллагаа, хөгжлийн байгууллагын Бичил, Жижиг, Дунд үйлдвэрийн санхүүгийн хүртээмжийг нэмэгдүүлэх төслийн Хоёрдугаар Ажлын хэсгийн хурал өчигдөр буюу 8-нд Ерөнхийлөгчийн дэргэдэх Иргэний танхимд боллоо. Хурлыг Монгол Улсын Ерөнхийлөгчийн Иргэдийн оролцоо, эдийн засгийн бодлогын зөвлөх Л.Дашдорж, Аж Үйлдвэрийн яамны ЖДҮ-ийн бодлогын хэрэгжилтийг зохицуулах газрын дарга Г.Билгүүн нар даргалж, Европын Холбооны хөтөлбөрийн менежер ноён Ронан Печер нээлтийн үг хэлэв.
Хурлын үеэр эдийн засгийн хамтын ажиллагаа, хөгжлийн байгууллагын Евро-Азийн Өрсөлдөх чадварыг дэмжих хөтөлбөрийн төслийн зохицуулагч А.Претет, бодлого шинжээч М.Бианкини нар БЖДҮ-ийн санхүүгийн хүртээмжийг сайжруулах төслийн хүрээнд гаргасан Эдийн засгийн хамтын ажиллагаа, хөгжлийн байгууллагын дүн шинжилгээ, зөвлөмжийг Ажлын хэсгийн гишүүдэд танилцуулж хэлэлцэв. Гаргасан дүн шинжилгээ, зөвлөмжийг Засгийн газар, ЖДҮ-ийг Хөгжүүлэх сан, Зээлийн батлан даалтын сан, банк, холбоод, төрийн бус байгууллага, БЖДҮ-ийн төлөөлөл харилцан санал солилцон, цаашид дахин хэлэлцэх болсон ба эцсийн үр дүнг 2016 оны 11 дүгээр сард Парис хотноо зохион байгуулах Эдийн засгийн хамтын ажиллагаа, хөгжлийн байгууллагын “Евро-Азийн Долоо хоног” хурлын үеэр танилцуулах юм.
Түүнчлэн уг хуралд Эдийн засгийн хамтын ажиллагаа, хөгжлийн байгууллагын урилгаар Францын BPI банкны Олон улсын зөвлөх үйлчилгээний захирал ноён Винсэнт ди Бэтта хүрэлцэн ирж Зээл, Батлан даалтын олон улсын туршлагаас хуваалцав.
