Мьянмарын Холбооны Бүгд Найрамдах Улсад хийж буй ажлын айлчлалын хүрээнд Монгол Улсын Ерөнхийлөгч Цахиагийн Элбэгдорж өнөөдөр Мьянмарын Төв банкны захирагч У Кяв Кяв Маунгийг хүлээн авч уулзлаа.
Уулзалтын үеэр талууд хоёр орны банк, санхүүгийн салбарын харилцааг сайжруулах, хамтран ажиллах шинэ боломж бий болгох чиглэлээр хөндөж ярилцав.
Мьянмарын Төв банкны захирагч У Кяв Кяв Маунг өөрийн улс орныхоо банк, санхүүгийн салбарын талаар товч танилцуулан энэ чиглэлээр цаашид хамтран ажиллах санаачлагыг дэмжинэ гэдгээ мэдэгдэв.
Ерөнхийлөгч хэлэхдээ “Хоёр орны хоорондын улс төрийн харилцаа өргөжин цаашид эдийн засаг, санхүүгийн хамтын ажиллагааг дэмжин, салбарлан хөгжүүлэх нь чухал байна. Зүүн Өмнөд Азийн Төв Банкууд байгууллагын гишүүний хувьд Монгол Улс нь бусад хөгжиж буй орнуудтай банкны салбарын туршлагаа хуваалцах, хамтран ажиллах тал дээр нээлттэй байдаг” хэмээлээ.
Мьянмарын Төв банкны захирагч У Кяв Кяв Маунг хоёр орны улс төр, санхүүгийн салбарын харилцаа сүүлийн жилүүдэд эрс сайжирч буйд сэтгэл хангалуун байдгаа илэрхийлэн, энэ хамтын ажиллагааг цаашид хөгжүүлэхэд анхаарч ажиллахаа мэдэгдэв.
Ерөнхийлөгч хариу хэлэхдээ хоёр орны ард иргэдийн хооронд шашин шүтлэг, түүх соёл гэх мэт адил төстэй зүйл олонтаа байдаг ба энэ нь дээрх харилцааг хөгжүүлэхэд дөхөмтэй байгааг онцолсноор уулзалт өндөрлөлөө.
