Мьянмарын Холбооны Бүгд Найрамдах Улсад хийж буй ажлын айлчлалын хүрээнд Монгол Улсын Ерөнхийлөгч Цахиагийн Элбэгдорж Мьянмарын Эрдэс баялаг, байгаль орчин хамгаалах сайд Он Винийг хүлээн авч уулзлаа.
Уулзалтын үеэр талууд хоёр орны уул уурхай, байгаль орчны салбарын хамтын ажиллагааг сайжруулан хөгжүүлж, цаашид харилцан ашигтай туршлага солилцох оновчтой арга зам бүрдүүлэх талаар санал солилцов. Монгол Улсын Ерөнхийлөгч хэлэхдээ Мьянмарын Худалдаа аж үйлдвэрийн тэнхимтэй Монголын тал сайн харилцаа тогтоон, бизнесийн болоод уул уурхайн салбарын харилцааг хөгжүүлэх чиглэлд хуулийн хүрээнд хамтран ажиллаж эхэлснийг дурдлаа.
Тэрбээр цааш нь хэлэхдээ өмнө нь Монголд уул уурхайн лицензийг хяналтгүй олгосны улмаас нийт газар нутгийн бараг тэн хагас нь гадаад дотоодын компанийн мэдэлд очсон байсан ба Ерөнхийлөгч үүнд хориг тавьснаар нөхцөл байдал сайжирсан. Мөн Монголд хууль бусаар алт олборлох, үүнд химийн бодис ашиглан байгалийг бохирдуулах явдал гарч үүнтэй тэмцсээр байгаа. Энэ мэтээр Монголын уул уурхайн салбарт тулгамдсан олон саад бэрхшээлтэй тэмцэхийн тулд холбогдох хууль тогтоомжийг сайжруулсаар өнөөг хүрсэн тухай Ерөнхийлөгч хэлэв. Энэ салбарт хуримтлуулсан туршлагаа Монголын тал Мьянмартай хуваалцах, эргээд Мьянмарын уул уурхайн салбарынхан гаргаж байсан алдаа оноогоо Монголд хүргэх талаар ярилцлаа.
Монгол Улсын Ерөнхийлөгч “Уул уурхайн салбарт төгс шийдэл гэж байхгүй. Харин өмнөх алдаа дутагдал, амжилт дээрээ тулгуурласан шийдвэр хамгийн оновчтой байдаг. Энэ салбарт бид Норвеги тэргүүтэй дэлхийн орнуудын туршлагаас судалж ажиллаж байна. Өчигдөр “Байгалийн баялаг ашиглалтын зүй зохистой менежмент 2” семинарыг Нэйпидо хотноо зохион байгууллаа. Уул уурхайн салбараас олсон ашгаас баялгийн сан байгуулах, энэ хөрөнгөөр бусад салбарыг дэмжих гэх мэт оновчтой шийдэл байдаг” хэмээв.
